Zoramthanga hin zani khan MNF office Mizo Hnam Run-ah thu hrilin, “Zu zor awma inngai haiin zu an zor ta ding a nih. Bawk nal sen a, tuikurluk suk koi a, ban sawm nei hmaa puja awma inngai hai an puja ta bawk. Kohran, NGO le Mizoram-a Kristien hai hin ei thaw awma ei ngai thaw ve tang ei tiu,” tiin a hril.
MNF president chun, kohran le tlawmngai pawl ha’n an veng le khuo-ah zu zor an phalnaw a ni chun zu zor a ni hma’n zu leia buoina a’n ṭan ding thu a hril bawk.
Mizoram Pradesh Congress Committee (MPCC) president Lal Thanhawla khomin zani khan Congress Bhavan-ah thu a hril a, “Zu khap burna dan hlip a, umze nei lema zu khuokhirna dan hmang dingin sorkar chu huoisen takin a fe a nih. Sorkar chu tlawm a ṭul khomin huoisen takin a tlawm a, Pathien rawn zingin huoisen takin sin a thaw a nih,” tiin a hril.
Kum 1995 khan MLTP Act chungchang-ah a keihruoi sorkar le an party hai hmin zan loin kohran nuom danin zu khapna dan an siem thu hrilin, “Kohran nuom dan chu inza-in zu khap a nih. Amiruokchu, kohran ṭhuoituhai lai khom zo khap burna dan ditnaw an um ve tho a, a huhua an dit chu mimalin an ditnaw a nih,” tiin Lal Thanhawla chun a hril a, MLTP Act chu a hlawtling khom a ring naw thu a hril bawk.
Mizo Hnam Run-a inkhawmnaa thuhriltu dang MNF treasurer Vanlalzawma chun, MLPC Bill pass a ni chungchang-ah, “Ban phar tamna-ah kan hne naw a, Mizo mipui tam lem hai thlopna ruok chu kan hlaw thoin ka hriet,” tiin a hril.
Loading....