Aizawl, August 3, 2014: Vawituk dar 5 khan August ni 1, 2014 zing dar 3:45-a Lt. Col. (Retd) ZS Zuala Parliamentary Secretary chengna In, Mission Veng-a bomb sukpuoktu nia inhril Lalringthang (45) s/o PT Kaia, Muoltluong, Diphucherra, Cachar District, Assam chu Mizoram Police ha’n Dinthar Veng, Vairengte-ah an man.
Lalringthang hi vawisun la la khan Mizoram Police ha’n Aizawl tlungpui nghalin Home Minister R. Lalzirliana chun hi chungchanga hin chawhnung dar 2:30 khan a chengna in-ah chanchinthar thedartuhai a pawl nghal a nih.
Home Minister chun, "Tuta sawrkar-ah ṭum 6 lai misuol dawizep tak ha’n remna le muongna sukbuoi dingin sawrkar le mipui sukthlabara bomb sukpuokin a ruk thei ang takin hma an lak a nih," a ti a. Ringhlana an neina a sawt tah thu hrilin, hi hi sukchieng dingin Manipur chanchinbu pakhat ‘The Sangai Express’-ah tulai hnaia Mizoram-a bomb puok chu HPC(D) ha’n “kan sukpuok a nih” ti’n an puong a nih, ti’n R. Lalzirliana chun a hril
“Local politics leia hi thil hi tlung a ni nawh,” ti a hrilin, R. Lalzirliana chun "HPC(D)-in an sukpuok a nih ti an 'claim' hnung khan ngawr takin hma kan laka August ni 1, 2014 a bomb puok le inzawmin HD Lalhmangaiha, Asst. Secy Mizoram Hmar Welfare Committee (MHWC) le HD Lalrinpuia hai chu Mizoram Police ha’n manin hi hmalakna fepei-ah Lalringthang hi man a lo ni ta a nih”, a tih.
Minister chun August ni 2 zan dar 11 khan Lalringthang umna hi an hrietsuok thu hrilin hi zan la la hin Vairengte panin police hai hi an fe nghal a. An man hnung hin police hai kuomah, ZS Zuala In bula bomb puok le August ni 22, 2014 zingkara Bungkawn Vengthar-a Hmingchunghnung, Chairman, SHDC in bawl mek bula police gypsy-a bomb-hai kha ama sukpuok ngei a ni thu a puong a nih, ti Home Minister chun chanchinbumihai a hril.
Lalringthang hin HD Lalhmangaiha tirna’n bomb hi a sukpuok ti police hma-ah a puong a, HD Lalhmangaiha leh Lalringthanga hai hi HPC(D) haiin tukum April thla khan an lo ko ta bawka, chu result chu a ni an ring thu Police hai hin an hril.
SDHC Chairman Hmingchunghnung a chengna Bungkawn Vengthar anthawka veng neituhaiin thla 3 sunga an veng suoksana sawrkar quarters-a in umtir dinga an ti chu Home Minister chun Quarters-ah a um naw ding thu a hril.
Lalringthang hin ZS Zuala In-a bomb a sukpuok hi Kg 2 vela rik gelatin tluon 15 vel a ni a hril a, a bomb kam a puok meu hin chu Salem veng, Aizawl-a an sunghai in bul a tlung hman nawk tah niin police-hai chun an hril.
Loading....