Zani zing dar 2 (IST) vel khan China ram-ah lir an hning a, Longtoushan biel hnuoi km 23-a thuk anthoka inhning tan ni a hril a nih. Ludian County-ah mi 120 chuong an thi a, In chengna 12,000 vel a chim bak-ah In 30,000 vel a suksiet bok a nih. Ludian County-aq hin infepawna, inbiekpawna le meivar hai a suksiet bok a nih.
Lirinhning lei hin Qiaojia County-ah mi 30 vel an thik bok a, In chimin a del mi 40 chuong an hliem bok a nih.
Lirinhningna hmuna hin sansuokna sinthawtu ding mi tir nghal niin, sipai helicopter 2 bak-ah hmangruo phurtu vuongna tir nghal a ni a, lirinhning tuortuhai mamaw ding le puon In hai thon a nih. China sorkar chun lirinhning tuortuhai hmang ding puon In 2000, folding bed 3000, rizai 3000 le coat 3000 a thon ta bok a nih. Amiruokchu, thiltlungna hmun a hin ruo a sur sunzom ding leiin meikei a um leiin sansuokna sin hi an thaw hrat thei naw a nih.
Rambung hrang hrang hai chun China-a lirinhning tuortuhai an tuorpui thu hrilin, China sorkar chu a ṭul anga pui dingin an inhuom thu an hril.
Kum 2008 khan Yunna province ṭhenum Sichuan province-ah lir nasa tak an hning leiin mi 90,000 vel an thi hnung khan China sorkar chun lirinhning inchuk chiengna tieng nasa takin ṭhang a lak a, sum khom ṭhahnem tawk tak a seng bok a nih.
Loading....