Cyber Crime-a inrawl CCPur mi iemanizat an um: SDPO

CCPur, August 19, 2014 (HT): Mr Emmanuel Fimate, SDPO, CCPur chun, CCPur mi Cyber Crime-a inrawlna nei ṭhahnemtawk tak an um tiin zanita tuolsung chanchinbu reporterhai an hmupuina huna a hril a, Bank Account (active accounts) hai sum le pai ditna leia midang inhmangtir mei mei lo dinga fimkhur dingin mipui hai an hriettir.

Hiengang (cyber crime)-a inhnamhnawi hai hi a tlangpuiin CCPur a inthawk an ni a, mi bank account/passbook hai Rs. 4000/5000 inkar velin an inchawk a, kawr-levai le midum (negro) hai kuoma hi neka tam lemin an zawr sawng ngawk hlak a nih. Hienga zawr sawnga um Bank Account hai hi an mi hlem hai sum-le-pai transfernain an hmang hlak a nih tiin SDPO, CCPur chun a hril.

Hiengang cyber crime hi North East nuhmei, a bikin midum (negro) an inhmelhrietpui naa inthawka inṭan le tam em em ani ni tlangpui a, tuhin CCPur Police chun Cyber Crime thuah case 4/5 vel an suizui mek niin a hril a. August 14, 2014 khan Visakhapatnam (Andhra Pradesh) Police han Hmarveng-a inthawk Cyber crime thua an man Joseph Kailalsang (23) s/o Lalkhawthang chu ruolbanlo le Bank Account khawm nei thei dinga inhmelo a ni lai zingin a sung/hmelhriet han a hmingin Bank Account pathum ngawt an hawng pek niin SDPO chun a hril bawk.