HC & AF in Hmar hnam sunga officer tling thar hai lawmpuina

CCPur, August 10, 2014 (HT) : Hmar Chief and Authority Federation (HC& AF) chun zanikhan VETC Auditorium, Rengkai Muolhlum- ah Hmar hnam sunga tulai hnaia Civil le sipai tienga Officer sin hmu thar le thawk mek ta hai lawmpuina le sungkuo inpawlkhawmna (Felicitation-cum- Family Get together) an nei.

Hi huna hin Pu L. Keivom, Pu Lalzar B. Sinate, Dr Chaltonlien Amo, Chairman, Hill Areas Committee (HAC), Govt. of Manipur le Pu Varhlirsang Varte hai khawm ṭhangin thuhrilna an nei bakah RIMS, Imphal Director hlui Dr L. Fimate, Kohran tum tuma ṭhuoituhai baka hnam sunga Pawl tum tum ṭhuoitu hai an ṭhang a. Tuiṭhaphai biela khuo tum tuma Lal le Village Authorities hai an ṭhang tawl. Pu Songneilien Songate hun vawngtu in a ṭhang a, Rev. Tlanghmingthang in ṭawngṭainaa hun a hawng zovin Pu Lalmalsawm, Vice President HC&AF in keynote address a hril a, Pu Lalrohlun, Jt. Secy. HC& AF) chun HC&AF thuah report a pek zovin Rev. Lalrosiem Songate chun Officer tling thar hai ta dinga malsawm- ṭawngṭaipekna a nei.

Lawmpuina hunser hmangnaa hin Jonathan s/o Rev. Lienhnun of Rengkai (ama hi Chandel District, Manipur-a posting in Assam Rifles a Captain ni mek a nih). Fimsanglien Tuollai s/o Dr F. Thienkhogin of Rengkai, CCPur ( tulai hnai ela Assistant Commandant inziek kai a nih). Lalropui Pudaite s/o Dr Rosiem Pudaite of Zomi Colony (Lamphel, Imphal-a umin CRPF -ah Assistant Commandant a nih). Solomon Lalneilien Fimate, S/o Fimsanglien, Khawmawi (SDC Tipaimukh sin thaw lai mek). Lalthanzam Fimate, S/o Vanlalsung, Rengkai Road (DC Office, CCPur). Lalrobul Fimate s/o Dr L. Fimate, MCS (tuta SDO Singngat sin thaw lai mek). Emmanuel Fimate, S/o Biekvel Fimate, Rengkai Road, MPS (tuta SDPO, CCPur sin thaw lai mek) le Zorisang Thiek Pangote, S/o (L) Chawngsangvung Pangote, Hmarveng ( Secretariat a thawk lai mek) hai an nih. Hi huna ṭhang dinga fiel Nk. Lalṭhazam, MCS chu dam nawna leiin a hung ṭhang thei nawh.

Pu Lalmalsawm, HC&AF Vice President chun, HC &AF hi hnam sunga inthuruolna le inlungruolna ṭha lem a um theina dinga indin a ni thu a hril.

Hi huna thuhriltu hai chun hnam hmasawnna dinga thil ṭul le pawimaw, hma lak dan ding le thaw dan ding hai tawi fel takin an hril bakah Hmar Chief and Authority Federation in hiengang Officer sin hmu thar hai lawmpuina hun an buotsai chu lawmum an ti thu an hril tawl.

Vote of Thanks Pu V.L. Mawia, President, HC&AF in a hril a, hun tawp ṭawngṭaina Rev. Ros Infimate in a nei zovin zantieng ruoi hlim tlang takin an kiltlang.