Police han Zu sekkhawlna hmunpui inthawk Zu tam tak an dapdawk

CCPur, August 13, 2014 (HT) : Zani zantieng 1:30PM vel khan report an dawng dungzuiin SDPO CCPur Mr Emmanuel Fimate, MPS; SI Thangpu Tonsing; SI Siamkhanlal le ASI Thangkhanmang hai inrawinain Police le VDF han Khumujamba hmuna Zu sekhawl le thuprukna hmunpui In pakhat a dap a, Ar an siena hnuoi tanky lien sunga inthawk Zu sen (IMFL) le local zu ṭhahnemtawk tak dapdawkin an man.

Zu an man hai hi zani zantieng 5:30PM vel khan Truck lien pakhat le 407 Truck pakhat sipin SP, CCPur Office an phurtlung. Zu an man hai lai hin Kingfisher cage 37, Blue Ribbon cage 15, Officers Choice cage 25, Imperier Blue cage 2, Bagpiper cage 46, Howards cage 2 le can 20; Foster cage 15 le Can 336 bakah Officers Choice Blue cage 10, Palone8 Can 4, Romanov cage 42, McDowells No. 1 cage 21, Tuborg cage 2, Budwires cage 2 le local zu ṭin 11 a ṭhang.

Zu lak zo lo an la nei leiin hi lai hmun hi Police chun chabi kal khumin a hnunga lak dingin an maksan. Zu an la lak zo lo hai hi lo tawk chang a ni chun a in neitu hai man ning an tih tiin Police thusuok chun a hril. Excise Depatment hai leh ṭhanruolin Zu hai hi suksiet vawng ning an tih.

Mr Kabib, IPS, SP, CCPur chun, Manipur hi dry state a ni leiin zu zawr khap a ni a, CCPur District-ah Zu inrui leia buoina tum tum le hnam buoina chen tlung thei laka invengnaa Police han August thla bula inthawk Zu dona sin hi an thaw ṭan a ni thu a hril a. Zanita Indian Made Foreign Liquor (IMFL) mana um hi hun dang haia le tekhi in IMFL (zu sen) an man rawn tak ṭum a la ni thu a hril.

Independence Day sukbuoitu um lova ṭha taka hmang a ni theina dingin Assam Rifles, IRB le BSF han hma an lak mek a, helpawl ṭhenkhatin I-Day sukbuoi an tumna le inzawmin Police, IRB, AR le BSF han zing (vawsun) a inthawk hmun ṭhenkhat haiah dappui thaw ṭan an tih tiin SP, CCPur chun a hril.