Secretary, HNU Block No.1, Parbung
Parbung Community Health Centre (CHC) a hin damnaw enna room pakhat le inṭhuina/pan tuoma (dressing room) room, ticket semna le nauneina room le damnaw room pali hai hi function anga ngai a ni a, Nursing duty room ruok chu hawng a ni ngainaw ve thung.
Damnaw room pali a hin khum pahni pei sie ani a. Iem ani chang chu khum a ruok ngai nawh. OPD Ticket hi a tlangpuiin ni khat-ah 10-30 dam sem chang a um hlak. Doctor umsun hai hi rotation-in an hung um hlak a. Rotation hi tu khawmin an sawisel naw a, regular-a an um theina ding ani phawt chun, tiin phal pek an ni a. Hi lai zing hin mipui ta dinga harsatna lientak a hung um a. Doctor hung duty pa/nu duty tawp charin a kai tung nghal a, a thlak ding hung hman karlaka ni 2-3 dam a um hlak hi a pawi tak zet.
Damnaw Admit khuma zal zing maksan a Doctor a chatlak hlak hi a pawi tak zet. Parbung hmun ngeia ni khat sung bek in-charge hlak hai sien nuom a um tak zet. Mipui tieng khawm mawl leia risie deu le Doctor hang inen ding laia ṭhungna ding naw met a lo thung dam le thil dang dang khawm lo um hlak sienkhawm, Doctor le staff haiin hmusit deua hang hal le biek el hai hi la thawnawhai sien, la hung hrietthiem pei ding lema ngai thei hai sien nuom a um tak zet bawk.
Chun, ni thum vel chatlak hnungah nuhmei Doctor pakhat 29th April 2014 zing dar 6:30 vel-ah a hung tlunga. Hi ni hin Doctor hung tlung ding leiin a pawimaw zuol deu hai ning an ta, damnaw mi paruk (6) velin ticket an lak a. Inhnu deu chun a hang en tawla darkar li (4) lai lo nghak ta naute damnaw pakhat chawhnung 1:30 chun an ticket chawi hang luta inentir an hang tum chun Doctor nu chun ka sawl ka enpei ta nawh, tiin en nuom loin a um a. Naute nu le pa chu lungawi lo deuin an kir taa. Darkar khawm liem hman loa chun Doctornu khawlai leng invak an hang hmuzui nawk nghal el a. An lungsen zuolin ka kuoma an hung in tlun a, ka lung a awinawpui tak zet.
Hi chauh hi an nawh. Kumhni sung vel hin mipui chier hi hril ding a um zing a. Vawikhat chu Doctor pakhat kan biekpuinaa chun, tuta MO incharge hin amin hnikpui naw em a. Keini ta dingin inhnik rak le tlawmngai insuo a ṭhangkai nawh, pei a um nawh, ami ti pek daih a, a pawi tak zet.
Mipui leiin Doctor an ni a, Sawrkar-in hlaw tamtak a pek bawk a, an thawk si leh ṭhahnem hang ngai met hai sien, mipui lawm an hlaw ngei ka ring. MO in-charge in a hril danin, Ambulance khawm hi Guwahati-a payment sa in a um a ti hnungin kumhni a tling nawk taa. Vawisun ni chen hin mipuiin Ambulance kan la hmu nawh.
Chun, Quarter hluo lo pahnih, a ṭiek pakhat le quarter pahni kum li (4) liem ta laia bawl ṭan, tu chen hin zo loin a la um zing bawk. Hieng ang chauh a um khawm hi nisien khuo sawmpariet a inthawkin damnaw beidawng hung inphurlut chu an chawl chuong nawh. Damdawi le medical instrument umnaw sien la khawm Doctor umsun bek hai hin damnaw hai hi lunginsietna ṭhangin enkawl hai sien nuom a um hle.
