Thu dong danin, tu tak hin sorkar le inkapchawl le inbiekna neipui mek Assam-ah helpawl 14 an um a, hieng hai lai hin a’nlar zuol pawl hai chu United Liberation Front of Asom (ULFA) le National Democratic Front of Boroland (NDFB) hai an nih. Hienglai zing hin hieng helpawl vek anthoka suok dok, sorkar le inbiekna nei nuom lo pawl an um a, an thothang hle bok a nih. Helpawl thar indin khom an um a, suidan chun tu taka Assam-a helpawl um zat chu a tlawm tawp-ah 14 an nih, tiin ei thu lakna chun a hril bawk.
Tu kum sung ringot khom ṭum hni lai police officer hotulien pahnih – Superintendent of Police (SP) le Additional SP – hai chu helpawl haiin an kaphlum a; hieng ṭum hni a hin sorkar le inbiekna nei mek helpawl anthoka suok dok hai kut a'nrol ve ve bok nia hril a nih.
Helpawl insuk hran hai lai hin Songbijit inrawi NDFB le ULFA (Independent) hai pahni hi hriet hlaw deu tak an nih. Kum 2 liemtah anthok khan Karbi Anglong le Dima Hasao district anthok khomin helpawl indin thar an ni a; chuonghai chu United People's Liberation Army (UPLA), United Karbi People’s Front (UKPF), Naga Rengma Hill Protection Force (NRHPF), United Dimasa Kachari Liberation Front (UDKLF), Dima Jagi Nyso Army (DJNA), Karbi National Liberation Army (KNLA) le United People’s Liberation Front (UPLF) an nih.
UPLA helpawl hi Hamrem SP kaphlumtu nia ring an ni a; cadre 27-a indin ṭan niin, 17 hai chu United People’s Democratic Solidarity (UPDS) helpawl-a lo ṭhang hlak an nih. UPDS hai hi sorkar le inremna lekha lo ziek tah an nih. UPLA hai hin UPDS hai ralthuom an hmang nia hriet a ni a; UPDS le sorkar inbiek rem khan UPDS chun an ralthuom po po an pek lut naw a sukchieng bok a nih, tiin ei thu lakna chu a hril.
