Lok Sabha inkhawmna a zawna sangin, finance minister Arun Jaitley chun, kum 2008-09 sunga ‘agriculture debt waiver scheme’ fepui dan suina-ah, hamṭhatna dong thei lo mi 6,823 thlangsa an ni thu hrilin, hieng mi hai anthokin Rs. 627 crore hmu let an nawk ta thu a hril bawk. Thil indik naw taka thawna a inhnamhnoi bank thuneitu 5,400 hai lak-ah action lak a ni ding thu hrilin, First Information Report (FIR) khom 22 ziek lut a ni ta thu a hril bawk.
United Progressive Alliance (UPA) sorkar-na hmasa lem a khan kum 2008-09 budget-ah loneituhai leibat ngaidamna scheme hi a siem a ni a, Reserved Bank of India (RBI)-in public sector le local cooperative bank fetlangin hi scheme hi a fepui a nih. Scheme hi loneitu 3.73 vel hai sor thei dinga riruong a nih.
Comptroller and Auditor General (CAG)-in hi scheme chungchang a endikna-ah, sum peksuok dan-ah thil fel naw tak a um ti a hmusuok a nih. CAG report hi Parliament-ah phar a ni hnungin sorkar thlungpui chun RBI kuomah bank le bank thuneituhai, scheme inkeihruoi dan zawm lo hai chung-ah action la dingin a’nhriettir ta bok a nih.
