Hi thil hi Imphal anthoka km 65-a hla Imphal-Ukhrul lampui, Shangshak police station huom sunga Finch Corner hmun laia thiltlung a nih. MDC Ngalangzar Malue hi Phungyar sub-division a an khuo Nongman-ah a nu damnaw kan dinga fe a nih.
Police hai hrildan chun, ADC member chuongna motor hi helpawl mi 4 velin lampui sir lai an lo dang chat a, an silai chawiin an ṭhutkhum niin an hril.
Ngalangzar vapa Ratanmi Malue (25) khom helhai hin an kap fuk a, vangneithlak takin hmun 30 zet a hnungtieng ṭhuoi hai sienkhom a thi naw a nih. An driver-pa khom hi kap fuk a ni a, Winger motor-a chuongin hienglai hmun anthok Imphal tieng panin a tlansie ni a hril a nih.
Hmun danga inthoka thu dong danin, MDC-pa chuongna motor hi helhai hin Imphal anthokin Maruti Gypsy-a zuiin lampui-ah an pel a, an lambunna hmun lai hin an lo inchan a nih.
Ngalangzar hi kum 65-a upa a ni a; a nuhmei, nau pasal 3 le nau nuhmei 3 hai a thi san a nih. A ruong hi autopsy thaw dingin JNIMS hospital, Imphal-ah sie lut a nih.
Ukhrul Deputy Commissioner (DC) Modak Hrisheekesh Arvind le Superintendent of Police (SP) S. Selvan hai chu lambunna hmun a hin thukhawchang enfel dingin an tlan phei nghal a; Manipur chief minister Ibobi Singh le deputy chief minister Gaikhangam hai khomin Ngalangzar sunghai inhmupuiin an sunpui hle thu an hril.
Police haiin thiltlung thu an hriet le inruolin a sevela police station hnaih haia inthok police team an tlan phei nghal a, Assam Rifles sipai hai leh helpawl hai hi man tumin dappui thaw nghal hai sienkhom helpawl hai hi an tlanhmang hman a nih.
Lambunna hmun hi Ukhrul district headquarters anthoka km 20 vel a ni a, Shangshak police station anthok km 5 le Ramva-a Assam Rifles hai Outpost anthok km 3 vel a nih.
Hienglai zing hin zingkar dar 9:30 vel khan Langthabal Kunja Mayai Leikai lai bomb a puok a, naupang kum 6 mi le midang 5 an hliem bawk..
Bomb hi lampui sir lai puokin, lampuia tlan auto-rickshaw chu dengin a sunga chuong mi 6 hai hin hliem an tuok a nih. Hliem hai hi RIMS hospital panpui nghal an ni a, anni lai hin mi pakhat le a tupa chu an na zuol deua hril a nih.
Ei thu lakna'n a hrildanin, Chandel district headquarters-a Mini Secretariat hong dinga fe Manipur chief minister Ibobi Singh le a vengtu motor hai chu bomb puok hun minute 15 hma khan hienglai hmun hi an hraw a, Assam Rifles hai truck pahni khomin bomb puok hma minute 2 hma’n hilai hmun hi an fe pel bok a nih.
Police hai hrildanin, helpawl hai hin IED bomb hi remote control hmangin sukpuok niin an hril.
