Zani hmasak July 8 khan India State of Forest Report (ISFR) chun kum 2013-a an report chu tlangzarna New Delhi khawpui-ah an nei a. Hi report dungzuiin kum hni liemtah nekin India ram ramngaw-in a del chin ram chu sq. km. 5,871 zetin a pung a; West Bengal-ah a pung rawn taka, ramngaw pung 100-ah 60 zet hi West Bengal sung bik-ah a nih. Orissa, Kerala, Jharkhand le Bihar a hai khom ramngaw a zau sa bok a nih.
India hmarsak tieng ruok chun kum 2011 nekin kum 2013-a ramngaw tlawm lem dan chu sq. km. 627 zet a nih. India ram puma ramngaw hmun 4-a ṭhe a, hmun 1 hi India hmarsak biela um a nih.
Andhra Pradesh-a khom sq. km. 273 zetin ramngaw a pung a, Madhya Pradesh-ah sq. km 178 a pung bok a nih. India riruong danin, India ram 100-ah 33 hi ramngaw a inhuoptir tum a ni a, tuta ngirhmun a ding chun ala hla a nih.
Forest Survey of India chun kum 1987 anthok khan India-in ramngaw a nei zat uluk takin an inchuk a, an survey neinaa an hmangruo hmang tak chu satellite a nih. An report hi insuo hlakin, a bichiengna chu ISFR in an suksuok hlak bok a nih.
Ramngaw humhimtu pawl hai chun ISFR thawdan hi an soisel nasa hle. Ram hectare khat-ah thing le ramhmunin 100-ah 10 amani, a chungtieng amani a hluo chun ramngaw an ti huom sung-ah an inṭhang hlak ni a hril a nih. Hi hi ramngaw tak tak an tling nawh, tiin ramngaw humhimtu pawl hai chun an hril.
India hin ramngaw an suina report hi kum 2 dan pei-ah a suksuok hlak a, kum 2 dan peia suksuok hlak rambung umsun a nih. USA chun kum 5 dan pei-ah a suksuok hlak a, China-in kum 4 dan pei-ah a suksuok ve thung hlak a nih.
