Kumtling loa ngai hai kum bithliena sukhnuoi a ni theina ding hin Juvenile Justice Act (JJA) siemṭhat rot a ni a, hi rotna hi Law Ministry chun a pom taa, cabinet pompui dinga thon a ni ta bok a nih.
JJA hnuoia hin kum 18 tling lo chu kumtling loa pom niin, dan an bawsiet le poitawkna-ah khom puitling anga hrem lo dinga ti a nih.
Kum 2012-a Delhi khawpuia nuhmei pakhat rawng taka pawngsuol hrona thattu laia khan kumtling lo pakhat a ṭhang ve a, poitawktu danghai thi dinga hremna pek an ni lain ama hremna chu suknep pek a nih. Hi thiltlung lei hin mi tam takin JJA hi siemṭha a, kumtling loa ngai chin hi kum 16-a sukhnuoi dingin an rot a nih.
JJA siemṭhatna ding hi Union minister for Women and Child Development Maneka Gandhi rotna anga siem a ni a, Law Ministry khomin rotna a siem hai hi a sukdanglam chuongnaw a nih.
Maneka Gandhi chun nuhmei pasalna tieng hoia poitawkna tam tak chu kum la tling loa ngai hai thaw a ni thu hrilin, hieng mi hai hin JJA hnuoia hin hrem thei an ninaw ti inhre-in poi an tawk hlak a nih, tiin a hril. Hi lei hin kum bithlie zat hi kum 16-a sukhnuoi a ni ngei theina dingin a mimal khomin thei tawp a suo ding thu a hril bok a nih.
