Manipur chief minister Ibobi Singh-in zanita Manipur Assembly House-a budget session fe lai meka a hrildan chun, State sunga sie khonna anthoka sum sukpungna dinga State Excise Act chu kum 1948 anthok um a ni thu le Liquor Prohibition Act chu kum 1999-a hmang ṭan a ni thu a hril a; sorkar-in zu, ziel, dum le a dang dang khap sienkhom State puotieng anthokin India siem zu chu a hung lut zing tho a nih, tiin a hril.
Hi lei hin sorkar chun Manipur-a zu khapna dan hmang zing ṭhatna le ṭhatnawna hai a buk ton mek thu a hril a, State puotienga zu chu mipuiin olsam takin an hmu zing tho leiin khuokhirna dan khauh tak hmanga hlip tum a ni thu a hril bawk.
Zu khapna dan hlip a ni chun State sunga zu khom puongtieng thon suok thei a ni ding thu a hril bawk a, hi thu le inzom hin sorkar chun mipui ngaidan a lak phot ding thu a hril.
India hmarsak State hai lai Nagaland le Manipur a chauh zu khapna dan sie a ni a, Assam-a chun sorkar-in zu le dum siemna hmun siemin puotieng a thon suok a, sum tam tak a lak lut a nih, tiin a hril.
Zu khapna dan thu hi eptu pawl anthok Andro MLA Th. Shyamkumar-in hriltlang dingin a put lut a, Manipur chu ‘Dry State’ a puong nisienkhom umzie a umnaw thu hrilin, zu khap nisienkhom State puotieng anthokin Assam Rifles le sipai dang hai ta dingin zu lak lut a ni zing tho thu a hril a nih.
Zu zor theina dan khauh taka siem a ni chun State khomin sum lam lut thei a ta, tuolsung mipui hai laia zu dawn khom a suktlawm pha ding a nih, tiin a hril bawk.
