MLA lungawinaw hai hin zani khan Assam CM Gogoi an ringzo ta naw inhriettir dinga Governor JB Paitnaik an hmu hnungin inbanna lekha an thelut nghal a nih.
Congress MLA lungawinaw hai hin Lok Sabha inthlangnaa Congress party che siet nasan mawphurtu’n chief minister Tarun Gogoi chu an intum a, a keihruoina an ringzo ta naw thu hrilin, a mawphurna anthoka inban dingin an phut bok a nih.
June 23 khan Central-a Congress hotu Mallikarjun Kharge chun MLA lungawinaw hai thil phut chu hrechieng dingin Assam an zin nghe nghe a, MLA lungawinaw hai ngaidan khom a lak bok a nih. Amiruokchu, All India Congress Committee (AICC) chun Assam-a Congress party buoina chungchang-ah thutlukna a siemfel thei naw a nih. Hienglai zing hin, AICC vice-president Rahul Gandhi chun chief minister Gogoi chu thlopin, MLA lungawinaw hai thlem lungawi lem dingin a ngen thung a nih.
Health minister Himanta le a rawi hai hin July 18 khan AICC kuomah thutawp thonin, chief minister Gogoi a chungchang-ah July chen thutlukna siemna hun an bithlie pek a, AICC-in thusuok a nei naw leiin party an suoksan ta a nih.
AICC thupuongtu Abhishek Singhvi chun party thuneitu insangin thutlukna a siem vat ding thu hrilin, thutlukna insiemtir dinga party thuneitu insang hai nor chi a ninaw thu a hril.
MLA lungawinaw hai hin Congress MLA 77 hai laia 55 haiin Gogoi an thlak an nuom ti an hril a nih.
Hienglai zing hin Tarun Gogoi tantu pawl cabinet minister 13 vel hai chun Congress party thuneitu insanghai kuomah Hemanta chung-ah ‘disciplinary action’ la ding le party anthoka hnot suok dingin lekha an pek ni a hril a nih.
Assam power and industries minister le Tarun Gogoi tantu Pradyut Bardoloi-in cabinet minister hia inṭhungkhawm zo chun, “Party inṭhuoidan ding duon angin Congress party hotu insanghai le CM kuomah a lungawinawna intluntir nekin Govenor kuomah inbanna lekha a pek lem leiin dan a bawsiet a nih,” ti a hrilin, minister 13 hai chun Congress party hotu insanghai kuomah Dr. Sarma chu party anthoka hnot suok dingin hnina lekha an pek thu a hril.
Minister hai hmalakna chungthu-ah Dr. Sarma chun, “Party anthoka mi hnok suok tumtu hai chu ditsakna kan hlan. Party chun an nuom dan angin ka chung-ah action an lak thei,” tiin a hril.
Hienglai zing hin Tarun Gogoi ditnawtu laia mi minister 3 le parliamentary secretary 2 hai chun an sin anthoka an inban nuom ve thu hril hai sienkhom, iengtikam an inban ding ti ruok chu an la hril nawh. Hieng minister laia pakhat Siddique Admed chun, MLA lungawilo hai po po chu an la’n ban naw thu hrilin, “MLA lungawilo hai hin Assam-a Congress sorkar sukchim niloin Tarun Gogoi hnot suok chu an nuom lem a nih,” tiin a hril.
