Thla pali nei dinosaur hmusuok

London, July 17, 2014: British Broadcasting Corporation (BBC)-in a tarlang danin, China hmar tieng Liaoning province-ah kum million 125-a upa dinosaur ruṭawl hmusuok a ni a, hi dinosaur ‘C. Yangi’ ti a ko hin thla pali a nei a, thla pali nei chi dinosaur hmusuok laia la lien tak ni dinga hril a nih.

C. Yangi hi China-a Bohai University le Natural History Museum, Los Angeles-a team haiin an hmusuok a nih. A hmur anthoka a mei chenin meter 1.3 vela sei le kg 4 vela rik dinga ring a ni a, mu le albatross vate hai nekin a lien lem a nih.

Mithiem hai inchukna anthokin, C. Yangi thla nuhnung lem hi thla pangngai ang chi niloin, a ke hnungtieng vate hmul anga ṭo tho si, thla pangngai tak tak anga a hmang a ni nawh, tiin an hril. A mei thla/hmul hi cm 30 vela sei ni a hril a nih. Mithiem hai chun an thil hmusuok hi an ngai poimaw hle a, hnuoi dinosaur pangngai anthoka dinosaur vuong chi vate inthla sawng dana thil poimaw tak ni dinga an ringthu an hril.

Paleontologist hai khomin, hieng thla pali nei thilsiem hai hi thla pahni nei vate hung suok naa poimaw tak niin an ngai bok a nih. C. Yangi hi a mei chang a sei hle a, hi hi boruoka a um laia a taksa lien le inhrol tak thununna dinga a hmang niin an ngai thu an hril bawk.