Hi bomb hi ZS Zuala hai gate sung, an zalna khingtieng panga puok a ni a, bomb sukpuok a hin thi le hliem an um naw a, a sukpuoktu ni dinga ringhlel le man an la um nawh.
Hi bomb hin Zuala hai riekna tienga bathroom kotkhar le darthlalang le hmangruo ṭhenkhat a suksiet nuol a, an ṭhenumhai In bang a sukkoi nasa hle a, insunga hmangruo ṭhenkhat a suksiet nuol bok a nih.
Zuala hai In chunga Girls Hostel tukver le frame hai khom bomb hin suksie nuol a, ni dang angin hostel naupang um tam lai lo nisien hliem tam tak tuor thei ding khopin bomb hin In a tawksiet a nih.
Bomb puok lai hin In sunga mi 4 chauh an um lai a ni a, insunga um hai hi bang thlang tieng, bomb puok nawna tieng an zal vong leiin hliem an umnaw ni a hril a nih. Hi bak-ah bomb puok hin Zuala hai In inhuonna brick fencing le gate hai khom a suksie nasa hle a, an ṭhenum hai In bang le hmangruo ṭhenkhat a suksiet bok a, an In sak laia synod quarter bang le tukver hai a suksie nuol bok a nih.
Bomb puok sawtnawte hnungin Mizoram home minister R. Lalzirliana chu a hmun-ah a tlung nghal a, R. Lalzirliana chun tulai hnaia bomb hmanag beina an tuok ta zeuh zeuh ni a hrilin tu kum khom voi 4 lai bomb a puokna niin a hril a, hieng hai hi misuol thilthaw a ni an ring thu a hril. Police haiin suizui nghal an ta, thilsuol thawtuhai chu man an ni chun an phu tawk hremna pek an ni ngei ding thu a hril bok a nih.
Parliamentary secretary ZS Zuala chun mimal amani, party ang annawleh le politics ang khomin ama beitu ding awm an um a hriet naw thu a hril.
Bomb puokna hmuna hin Police hotu DIG rawiin SP le police hotu lienhai an tlung ve nghal a, bomb puok hi ngun taka suizui nghalin, tuta ngirhmun-ah ieng bomb am hmang a ni a ti hriet nghal thei a ninaw a, bomb sinthaw dan hi ZS Zuala hai Inkawl hai chun damtea puok niin an hriet laiin veng hnaih laia hai anthok chun a thawm an ring hle thung ni a hril a nih.
Bomb puok hin hnuoi le a chungtieng pang sei tak a tawk siet leiin police thilsuituhai khomin ieng bomb tak am ti hril intak an ti hle niin an hril. Forensic tieng hai khom a hmun tlung nghalin an endik nghal bok a nih.
Aizawl South-II Block Congress ṭhalai hai chun an bieltu MLA, mi ta dinga poi hril ngailo le sorkar ta dinga ṭhahnemngai taka thoktu hieng anga that khom poisa loa beitu a tuok ta el hi an dem tak zet thu an hril a, tuta hnung an bieltu MLA chung-ah hieng anga thil tlung a um nawk ta nawna ding police hai tha hratna pel tieng theitawp suoa hma lak an tum ve thu an hril.
