DP&AR (GGC)-in inhriettirna a’n suo danin, document self-attest thaw ṭan hun ding chu tu kum April 1 a ni a, hi hi ensinna chauh a la ni leiin kum nawk March 31 chen hmang phot dinga ti a nih.
Sorkar-in self-attestation thaw thei a ni thu puong tah sienkhom, Aizawl DC office-a Judicial Branch ruok chun residential certificate, ST/SC certificate le lekha danga self-attestation thaw hi an pom naw a nih.
Tu chena self-attestation an pom naw nasan zawna sangin, Aizawl DC Dr. Franklin Laltinkhuma chun, order amani, thusuok amani an dong naw lei a ni thu a hril. DP&AR (GGC) ruok chun, department head le sorkar office hrang hrang-ah an thon vong tah thu an hril ve thung.
Sorkar thusuok tarlang danin, document self-attest hi 2nd Administrative Reforms-in “Citizen Centric Administration - The Heart of Governance" ti thupui hmanga report a siem 12-na bawzuina a ni a; sorkar fephung a suk olsam lem beisei leia thaw a nih. Indiknaw taka thil thawtu hai chu dan angin hrem thei an ni bok.
Document mania attest thei hai chu – educational certificate, educational marksheet, birth certificate, baptisma certificate, ST/SC certificate, residential certificate, electoral photo identity card (EPIC), family ration card le employment registration card hai an nih.
