North East Trade Union, Delhi indin tum

New Delhi, August 4, 2014: India hmarsak anthoka hung Delhi tlanga sinthaw an tam pei a; service industry, retail le industry dang danga thok an pungpei bok a, mani a sumdawngna chi hrang hrang thaw khom an pungpei bok leiin buoina tuok khom an pungpei a, abikin BPO le retail-a thok hai mumal taka hlaw hmulo dam an um nuol hlak leiin mi tlawmngai iemanizat haiin Labour Court hai khom an inhmupui niin ei thu lakna chun a hril.

Labour Court tienga hai chun, "Trade Union dam in nei naw chun ṭhangpui rak dan a umnaw a, Trade Union hung indin unla chun inbuoina hai-ah ṭhangpui thei kan cheu" ti a thurawn an lo pek leiin thla hmasak July 28 khan Indian Social Institute, Lodhi Road-ah inṭhungkhawmna hmasatak nei a nih.

Hmar nau khom iemanizat ṭhang dinga insingsat a ni a, nisienlakhom buoina chi hrang hrang nei leiin inṭhungkhawmnaa hin Benjamin Khawbung le Romeo Hmar hai pahni chu an va ṭhang a nih. Trade Union tieng thila mithiem Ashim Roy le lawyer Susanna hai ṭhuoina hnuoi-ah thil tam tak hriltlang niin, Trade Union le Campaign Union hai hi side-by-side a indin ṭha ti tlang a ni thu ei thu lakna chun a hril.

Trade Union-a hin hmun 3-a ṭhe a hmun 2 hi employee ni ngei ngei a ṭul a, a support-tu dingin Campaign Union hi khawtlang ṭhuoitu hai ṭhuoi dinga rot a nih. Indin ṭan hma’n member ding hai survey phot dinga riruong a ni a, hi survey thaw zo-ah, hung tlung ding August 13 khin indinna dingin inṭhungkhawmna nei dinga ti a nih.

Hmar nau khom Delhi-ah iemanizat an um a, private a sinthawhai po po member ni vong thei dan ding ngaituo mek a ni thu le hi Trade Union executive body a khom a tam thei tak ṭhang dan ding ngaituo mek a ni thu ei thu lakna chun a hril bawk.