Dam sung lung in-a intang dinga hrem

Aizawl, May 05, 2014: Kum 2011 June thla-a Aizawl Tuikual South-a Omega Travels office sunga inthatnaa intum Zirkhawnghaka chu Court-in thiemnaw an changtir a, rinum taka dam sung lung in intang ding le Rs. 10,000 chawi dingin a hrem a, Rs. 10,000 a chawi thei naw chun thla ruk lung in intang bel a tih.

Kum 2011 June 5 khan Zirkhawnghaka le a nuhmei Zohmingthangi hai chun Aizawl police station-ah fe in Zohmingthanga-in Zirkhawnghaka chung-ah kut a thlak tiin report an pek a. Police hai chun Zohmingthanga man dinga a in-ah an hang fe chun Zohmingthanga chu a taksa-ah hliem tam tak leh thisawngin alo um an hmu a, damdawi in an panpiu nghal a, a hliemna tuorzo loin a thi ta a nih.

Zohmingthanga thina thu-ah Zirkhawnghaka le a nuhmei Zohmingthangi hai chung-ah thubuoi siem pek an ni ta a nih. Court-in Zohmingthangi chu inhnamhnoina a nei naw tiin an suo a, Zirkhawnghaka chungchang chu tuolthat thubuoi-ah Court chun a ngaituo ta a nih.

Zirkhawnghaka intumnaa hin thuhretu 7 an um a, hieng hai le ama ṭantu thuhretu 3 hai le chun Court-ah thu indon fie an ni a. Zirkhawnghaka le Zohmingthanga hai hi insuol buoiin, Zohmingthanga chun Zirkhawnghaka chu iron rod-in a vuok a, chu iron rod vek chun Zirkhawnghaka chun Zohmingthanga chu a vuok let ve leia Zohmingthanga chu thi niin Court chun a hmu ta a nih.

Zikhawnghaka hi April 29 khan Addl. District and Session Judge Helen Dawngliana chun thiemnaw an changtir a, zani khan a hremna hi a puong pek ta a nih. Zohmingthanga hi Zohmingthangi naunu Chuangkimi pasal a ni a, zu le drugs thaw hlak nia hril an nih.