Mipuiin hmun hnia mi 5 an that hai hi misuol hon khat tho, hmun hmasa lema inthoka tlanhmang mipuiin an man nawk hai an nih. Mipuiin an that mi 5 laia mi 2 hai chu hrietchieng an ni ta a, 3 dang hai ruok chu la hrietchieng lo an nih.
Rongjeng anthoka chanchin lut danin, misuol hon khat mi 7 hai chu chawhnung dar 2 vel khan Jambal khuo-ah silai chawiin an fe a; a khaw mi hai chu silaia inṭhi-in sum pe dingin an ti a, a khaw mi lungsen chun an bei leta mi 7 hai laia mi 3 chu manin an vuok hlum a nih. Mi 4 dang hai chu hienglai hmuna inthokin tlanhmang hman hai sienkhom mipuiin mi 2 dang hai chu Silchang Gittim lai an man nawk a an vuok hlum nawk a nih.
East Garo Hills SP Davis Marak chun, “Suomhmang hon khatin khawsung mi silaia inṭhi-in sum an hni leiin mipui lungsenin an bei let ve a, an that niin thu kan dong,” tiin a hril.
Rongjeng police hai chu thiltlungna hmuna hai hin an fe nghala, misuol hai ruong chu an lak ta niin ei thu lakna chun a hril.
Thla 2 liemtah khom khan hiengang thoin North Garo Hills-ah mipui lungsenin dan loa sie khontu 3 an that a, South Garo Hills-a khomin mi 2 that an ni ta bawk.
Loading....