Sorkar-in self-attestation a thlang lem

New Delhi, July 16, 2014: Sorkar thlungpui chun sorkar keihnawi thil sin chungchang inhriettirna le document hran hrana gazetted officer chin hai hrietpuina la a, in attest tir ngai hlak chu sukboin, a document neituha’n an ni ngeia an attest thei a thlang lem.

State hrang hrang kuoma application form-a dingin affidavit lak ngai hlak chu ennon dingin inhriettirin, mani a in attest theina chu fepui lem dingin a ti niin Department of Administrative Reforms and Public Grievances thuneituhai chun an hril.

Thuneitu pakhat chun, “Affidavit lak hi thil buoithlak tak a ni a, hi ding hin Rs. 100-500 dam chawi a ngai hlak a nih. Hienglai zing hin gazetted officer tam takin document ṭhang lo chun an attest nuom ngainaw hlak. Hi hi thingtlang le hmun kilkhawra cheng hai ta dingin a buoithlak zuol a, State sorkar tin ha’n self-attestation hi an pom seng chun mipui ha ta dingin a olsam pha sot ding a nih,” ti a hrilin, mani document mani a attest phalna chu State ṭhenkhatin an fepui ta niin a hril bawk.