Kar thar tieng khin inchuklai 1,550 velin IIT Guwahati hnuoia undergraduate, postgraduate le doctorate programme hai chu inchuk dingin zom thar an ta, a lut thar ding hai le hin campus sunga inchuklai um zat ding chu mi 5,200 vel an tling ta ding a nih.
IIT-G hin hostel 10 a nei a; 9 hai chu pasal umna a na, 1 chu nuhmei hostel a nih. Hi baka hin nuhmei/pasal nei tah inchuklai hai ta ding khomin hostel a um bok a, nuhmei le pasal hostel thar ding pakhat ve ve bawl mek bok a nih.
IIT-G a thuneitu pakhat chun, pasal hostel 10-na ding pindan 956 nei ding khom bawl mek a ni a; inchuklai hai hmang ṭangkai thei ding food court, canteen, sports gymnasium, badminton, tennis, squash, volleyball, basketball, cricket field, football field, hockey ground, athletic ground, swimming pool le students’ clubs/societies hai khom campus sung-ah a um bok a nih,” tiin a hril.
Campus sunga hin bank 2 ATM khom a um a, post-office fethlenga railway reservation na ding, nitin mamaw inchawkna ding market complex hai khom a um bok a nih.
Inchuklai mi thar hung lut soisakna a um nawna dingin institute inṭhuoidan “code of conduct of students” besanin Anti-Ragging Committee khom siem a ni nghe nghe a, hi taka nina nei hai “anti-ragging squad” hai chun hostel le hmun ṭhenkhata hai hril lawkna umloin endikna an nei hlak bok a nih. Hieng anti-ragging squad hai hi inchuklai soisak dam a lo um a ni khomin thiltlungna hmuna suizui nghal theina ding thuneina le mawphurna pek an ni a, an report hai chu chairman le anti-ragging committee kuomah pek lut thei dinga ti an ni bawk.
English-medium anthoka inchuk suok lo le ṭong le zieka English hmang thiemlo hai ta ding khomin institute chun ‘remedical course’ a huoihot hlak bok a nih.
Hienghai baka hin inchuklai hai hmakhuo ngaituona leiin IIT-G campus sung-ah ‘medical facilities’ suongum tawk tak sie a ni a, damdawi in puitling khom a um bok a nih. Inchuklai mimal buoina chi hrang hrang nei hai ta ding khomin ‘counseling cell’ khom siem a ni bawk, tiin thuneitu chun a hril.
Loading....