Assam Rail Passengers Association (ARPA) general secretary Dipankar Sarma chun, Guwahati khawpui-ah rel terminal pakhat annawleh pahni dang siem belsa a ni chun Guwahati rel station harsatna chu a sawk zangkhai hle ding thu a hril.
“Railway Board haiin hi chungchang hi enfel vat hai sien nuom a um. New Guwahati le Kamakya hmun-ah terminal thar siem a ni chun Upper Assam le Lower Assam anthoka rel hung hai chu a hranin service pek thei ning a ta; hmun hla taka inthoka hung rel hai chu Guwahati Railway Station-ah inchawltir bik nisien,” tiin a hril a, India khawpui dang hai thawdan chu enton dingin a hril bok a nih.
Sarma chun, Delhi-ah Anand Vihar station chu Eastern States anthoka rel hung hai ta ding bika siem a ni a, Nizammudin station chu South India tienga inthoka hung hai ta dingin siem a ni thu hrilin, “Guwahati-a khom hiengang hi thaw thei a ni a, mi fe-le-hung hai ta ding khomin a var zang pek ding a nih,” tiin a hril.
Railway Board-in double-tracking project a buoipui mek khom a zofel vat a ngai thu hrilin, “Hmun ṭhenkhat-ah double-tracking line siemna dinga sum bituk zat hai chu 150% velin a kaisang ta a, hmun tam lem a hai hmang thei a la ninaw bok leiin Assam sung chauh naw khom India hmarsak biela railway infrastructure hmasawnna ding khom a dal bok a nih,” tiin a hril.
India hmarsak biela mipui hai chun rel chuongna le thuomnaw phur man suksang hai chu tuor ve hlak hai sienkhom railway hmangruo siem suok thar le suk hmasawnna hai chu an hmang ve phak naw thu Sarma chun a hril bawk.
Loading....