Police inspector kuomah meth damdawi lak ni a hril

Aizawl, July 29, 2014: Mizoram Excise & Narcotics department (END)-in July 20 zantienga Vaivakawn (Rangvamual road)-a Methamphethamine (Meth) an man neitua intum laia pakhat chun, Meth hi Aizawl SP hnuoia District Special Branch (DSP)-a inspector pakhat kuoma inthok a lak thu a hril.

Hi chungchanga hin police thuneituhai le END hotuhai chu inrem tumin an inbiek mek niin ei thu lakna chun a hril.

END hai hin Vaivakawn-ah meth mum 10,000 an man a, a neitua intum mi pathum - Thangbuanga (k/ 41) s/o Sapdela (Khawzawl Vengthar), Lalrammawii (k. 37) d/o Thangzuala (Champhai Bethel Veng) le R. Lalrinsangi (k. 36) d/o R Vanlalrema (Upper Republic) hai khom an man nghal a nih.

R. Lalrinsangi hin END enforcement hai hma-ah meth chu Aizawl SP hnuoia DSB-a inspector pakhatin a pek thu a hril a, police inspector khom thukhawchang indon fel a ni ta thu hril a nih. END-in police inspector man phalna Special Court-ah an hni angin Court chun phalna a pek a, amiruokchu an la man hri naw a nih.

DSP-a inspector hin July 23, 2014 khan special judge Lucy Lalrinthari kuomah ‘anticipatory bail’ a hni a, ‘interim bail’ pek a nih. Zani khan anticipatory bail hi ngaituo a ni a, amiruokchu anticipatory bail chungchanga hin thutlukna siem ni loin, interim bail potsei lem a nih.

Sorkar ukil hai hrildanin, police hai chun R. Lalrinsangi hin puotieng mi a sor niin an hril a, police le END hotuhai chu inbiek an tum thu hrilin, "Ṭha taka inbiekrem an tum lein anticipatory bail pek naw ding thu a khom Court-ah kan ṭhang taluo naw a nih,” tiin an hril.

Hienglai zing hin July 21-a END thusuok chun, July 20-a meth an man hi Burma anthoka lak, Aizawl-a zor ding, an zor suok hmaa an man pek niin an tarlang a nih. Excise thusuok-ah hin ruihlo neituhai hming tarlang a ni nawh.