Aizawl, July 29, 2014: Aizawl Khatla Bungkawn Vengthar Local Council le NGO hai chun Hmingchunghnung, Sinlung Hills Development Council (SHDC) chairman chu an Veng-a inthawka insawnsuoka sawrkar quarter-ah um dingin an phut.
July ni 24, 2014 zan khan Bungkawn Vengthar Local Council keihruoina hnuoi-ah veng sunga pawl hrang hrang (YMA, MUP, MHIP, VDP) aiaw ha'n July 22 zingkara Bungkawn Vengthar-a Bomb puok chungchang-ah Joint Meeting an nei a. Bomb puok chu kawng hrang hrang a’nthawka thlirin SHDC chairman Hmingchunghnung leh inkungkaina neiah Joint Meeting chun a ngai leiin Hmingchunghnung chu Council Chairman a ni sung po an sungkuo himna ding le vengsung a ralmuong lem theina di’n Sorkar Quarters-ah an sungkuoin um phawthai sien ti’n an rel.
Bungkawn Vengthar Joint meeting chun July 22 zingkara Bungkawn Vengthar-a Bomb puok chu a dem hle a, mipui sukthlabar zawng le sietna nasatak tlung thei zawnga inrikrapna reng reng an veng sung-ah tlung ta ngai naw sien an tih.
Bomb sukpuoktuhai chu sorkar-in an rang thei anga manin an phutawk hremna pe ngei sien a’n nuom thu an hril bawk.
Joint meeting chun kum 2014 sunga Bungkawn Vengthar khawtlang-ah hringna chan theina khawp inrikrapna bomb puok tum hni lai, (March 22 & July 22) tlung tah chungchang-ah sorkar-in Bungkawn Vengthar khuo le tuihai thlavang hauh dinga a sirnaw chu vangduoithlak a ti hle a, hieng ang thil tlung-ah sorkar hin a khuo le tuihai hi thlamuong hlak ta raw se, tiin sorkar thuneituhai a ngen
Loading....