YMA CEC chun, Chakma intiempui nei dan ding inchuk chieng dinga a tir hai report an ngaithlak hnungin, Chaka Autonomous District Council (CADC) huom sunga Chakma khuo 63-ah le Mizoram hmung danga Chakma intiempui nei dingin an rel a; intiempui sengso a dingin YMA member tin hai kuomah Rs. 5 dawl dingin an rel a, tu kum September thla sungin Central YMA office-ah thelut hman nisien, an tih.
Central YMA chun, “Dr. BD Chakma chu MDC bye-election boycott tumna-ah a ṭhang leiin CM kuoma minister a nina anthoka ban dinga kan lo ngen tah hnung-ah, July 26-27, 2014-a Silchar-a Chakma Convention-ah Mizoram satthla dinga an relna-ah a ṭhang lui lei hi Central YMA chun a hrietthiem naw hle a nih,” tiin an hril a; Dr. BD Chakma chu minister anthoka ban a ni theina dingin Mizoram chief minister kuomah na lema nor dingin an rel.
CEC meeting chun, P&E department-in electric bill a sukpung nasan le power tariff sutna ding P&E-in loan an lak zat, a pung le an la bat zat hai, thoktu um zat an indonna Finance department-in a sang dan chu an dit khop naw leiin RTI Act hmanga indon non nawk nisien an ti a; thla nawk September 30-a Ratu-a YMA General Conference-a kuollien dingin minister Lal Thanzara fiel dingin an rel bawk.
Loading....