Freelance reporter, kum 40 mi James Foley hi kum 2012 November thla khan Syria hmar tienga man a ni a, hi hnung hin a umna chin hrietzui an ta naw a nih. A sunghai chun zong hmu tuma beiin, “Find James Foley” campaign an thaw a, amiruokchu a chinchang an hriet thei naw a nih.
Islamist firfiek hai hin minute 5 aw vel video suksuokin, hi taka hin an laia pakhat hmaituom le Foley hai inlangin, thlaler-ah an um a, an umna hmun hi Syria am Iraq ram sung lem ti ruok chu hriet chieng thei an nawh. An video suksuok hi a hming-ah “A Message to America” an inbuk a nih.
Video-a hin firfiek-pa hi a duma inthuomin a hmai a tuom vong a, amiruokchu English a thiem hle a, British awphawi a hmang bok a nih. IS firfiek pawl chun, Foley hi US President Barack Obama-in an mi-le-sahai bei dinga thupek a suksuok hnung-ah phuba lakna dingin a lu tanbong pek a nih, tiin an hril
Foley hi America-a Global Post le media dang hai ta dinga Middle East-ah sin a thaw a; a nu Diane Foley chun a naupa hin a theitawpin Syria mipuihai tuorna khawvel hrieta puondar tumin a thok hlak a nih, tiin a hril. Diane hin Facebook fethlengin, firfiekhai kuomah an mi man dang hai insuo vong dingin a ngen a, “Jim ang boka poi hril lo an ni a, America sorkar policy-ah iengkhom thaw le hril thei an nei nawh,” tiin a hril.
US thuneituhai chun IS video suksuok hi an hmu tah a, a tak am a tehlem ti chu hrietchieng tumin an bei mek ni a hril a nih.
Loading....