Tui lakna pipe-in hip hlum

Aizawl, August 1, 2014: Mizoram Tlawng vadung anthoka Reiek pan na tieng km 3 vela hla a um, Vaipuanpho Gravity line enkoltu chowkidar anga sor Rohmingthanga (k. 46) chu tui lakna pipe (Gravity line) 150 mm a lienin a hip hlum a, a ruong hi zani zing dar 6 khan hmu a nih.

Vaipuonpho hi Tlawng vadung anthoka km 3-a hla Reiek hnaih tienga um a ni a, hienglai hmun anthok hin Aizawl khawpui chawmtu Tlawng vadunga tui pum ding chu hi Gravity line anthok hin inluong lut tir hlak a nih. Gravity line (pine) hi 150mm a lien niin, pipe kaw hmor hi changsuol pal vengna dingin uluk takin thir a char vong a nih. Rohmingthanga hih hi enkol ding le pipe kaw hmor hi hmunhnok le hna haiin a hnaw ding venga duty hlak a nih.

Ei thu lakna’n a hrildanin, Rohmingthanga hi zani khan hlaw la dingin Aizawl fe a tum a, a ruolpa pakhat leh zan tieng Reiek-Aizawl Service Maxi Cab lo inchan an tum a, a ruolpa hin zani zingkar Maxi Cab hung tlan a phar hnung khomin Rohmingthanga hi a la hung ve naw leiin ko dingin a fe phei nghal a, a hmu el naw leiin Vaipuanpho bula huon nei Rohmingthanga nute hai hrilin, sawtnawte an zong hnungin Rohmingthanga hi Gravity line 150 mm a lien hin a lo hip bet ti an hmu ta a nih. An hmu hin Rohmingthanga hi a lo thi hmang ta a, pipe lien hin a ban changtieng hip betin, a taksa dang ruok chu pipe hmor a thir an charna’n a dang a, a hiptu hi a hrat em leiin Rohmingthanga hi tuihokin a thi ni a ngai a nih. A thi hun tak hi hrietchieng thei ninaw sienkhom, Aizawl tieng pana a fe hma’n dar 5 bawr vel-ah pipe sukfai a tum leia vangduoina hi a tuok ni a ring a nih.

Vaipuanpho-a Gravity line hmor thir an charna hi changsuol pal vengna dinga ti nisienkhom, thir an kam pakhat chu a lo nghet tawk ta naw ni a hriet a ni a, hi lei hin vangduoina hi a tlung ta ni a ring a ni bawk.

Vangduoina tuok Rohmingthanga hi Aizawl Water Transmission Division, Maubawk-a post mek niin, Muster Roll (MR) a ni a, Vaipuanpho Gravity line enkotu chowkidar anga sor a nih. Hienglaia pipe hmor hi zanlai khom nisien a siem ṭha hlak a, hienganga changsuolna a tuok lai hin tui pipe valve a’nkhar naw a, tui pipe hipna taka hin a changsuol pa ta niin an lang a, a taksa-ah hliem dang hmu ding a um taluo naw a, a bawk tlawmte a kak niin ei thu lakna chun a hril.

Rohmingthanga ruong hi Ailawng-a an sunghai In-ah lak phot a ni a, Reiek-ah postmortem thaw a ni a, voisun sun dar 12 vel khan Bungkawn High School veng-a um a u RL Rochhunga In-ah vuiliem a nih.