Minute 40 vel an inhmu sung hin, Army chief chun Jammu & Kashmir le North East biela road project hai ṭan dan ding le zofel vat thei dan ding Union minister a hrilpui niin Army thusuok chun a hril.
China ram-in India hmar le hmarsak tienga ramri bul hnaih laia olsam taka a sipai le thuomhnaw hai thak inlon theina ding a siem chu inelpuina dingin India sorkar khomin lampui project iemanizat siem dingin an lo pom ta sa a nih.
Hieng project dungzui hin ramri bul hnaih lai hin ‘strategic road’ 73 siem dinga ti a ni a, amiruokchu, hieng hmun kilkhawr a hai hin lampui siemna hmangruo thon a harsa lei le environment tieng phalna pek a umnaw leiin lampui siemna sin ṭan el thei an naw a nih.
Hieng lampui project hai hi siem el thei an naw leiin India-in China ramri laia Mountain Strike Corps sipai sie dinga a ti khom tu chenin sie an la ninaw zing a nih.
Hmasak lai khan Environment minister Prakash Javadekar chun, ramri bul laia infrastructure siem ṭhatna dingin environment dan inthladul a ni ding thu le China le ramri km 100 chin project hai chu olsam taka phalna pek ning a tih, tiin alo hril ta bok a nih. Tu tak hin India hmar le hmarsak biel-ah lampui mel 4000 vel hai chu environmental clearance nghak mek an nih.
Thuneituhai hrildan chun, ramri bul hnaih lai hin infepawna ṭha a umnaw leiin tuolsung mi hai khomin nasatakin harsatna an tuok leiin an umna hmun hai an rausan hlak a nih, tiin an hril.
Transport ministry chun Border Road Organisation (BRO) sinthaw dan thu-ah an lung a awinaw hle leiin an sinthaw enfel dingin thu a’nsuo nghe nghe bok a nih.
BRO hi ‘strategic road’ 61 bawl dinga ti a ni a, an sum lak suok tah Rs. 4336.88 crore anthok Rs. 3877.52 crore chu an hmang zo ta a nih. Lam 503 an siem ding hai lai 17 chauh hmang thei dinga siem fel a ni a, lam 50 a hai chauh sin thaw mek a ni bawk a nih.
Road project 73 hai laia a hun taka zofel chu 33 a ni a, hieng hai hi India hmarsak tieng biela mi deu vong a nih.
