Jiribam-ah motor 15 suksiet

Jiribam, July 22, 2014: Manipur sorkar anthoka an thil phut le inzoma lungawinawna inentirna nei mek a chun Jiribam-a inchuklai pawl 7 hai chun Pathienni chawhnung khan National Highway-37 lampuia a ruka inlon motor 15 an suksiet a; motor hai hi Tamenglong district-a Tousem sub-division huom sunga Lhalnom khaw kawla laia suksiet an nih.

Nuorna nei inchuklai pawl hai suksiet hai lai hin motor 5 hai chu kuva hna le ra phurtu an ni a, a dang hai hi Railways hai Tata Truck vong niin ei thu lakna chun a hril. Motor suksiet hai hi venghimtu haiin an zui laia suksiet a nih.

Hienglai zing hin inchuklai pawl ṭhuoituha le Jiribam ADC chu zani Thawṭani July 21-a inhmu ding ti nisienkhom an inhmu naw a nih. Inchuklai ṭhuoituhai chun an nuorna suktawp ding le fepui pei ding chu ADC le an inhmu zoa hril thei chauh a ni ding thu an hril.

Inchuklai pawl ṭhuoitu pakhat chun, Jiribam-a sorkar sikul a hai sikul mamaw thuomhnaw le zirtirtu sorkar-in a sie hma khat nuorna sunzom a ni ding thu hrilin, iengkhom tlung sienla sorkar chun mawphur a tih, tiin a hril.