Assam tribal hnam 4 ha’n sorkar kuomah humhimna phut

Moran community demanding ST in Delhi

Guwahati, July 17, 2014: Assam phai le tlangram-a Schedule Tribe (ST) a tiem tribal hnam 4 inzomkhawm United Tribal Organisation, Assam (UTOA) chun Assam-a hnam dang 6 hai chu ST-a lak lut an ni khomin India danpuiin Assam-a ST a tiem ta hai hamṭhatna le chanvo a pek humhim pek an ni theina dingin sorkar-in hma la raw seh, tiin thusuok an siem.


Ni kuma Assam-a Bodo, Rabha, Karbi le Dimasa hnam haiin pawl inzomkhawm an indin UTOA chun kar hmasak Zirtawpni July 11 khan thuthar lawkhawmtuhai inhmupuiin, sorkar-in Assam-a hnam dang 6 hai kuomah ST nina a pek tum chu an dodal naw thu an hrilfie a; hienglai zing hin ST an nina hnuoia hamṭhatna le chanvo India danpuiin a pek ta chu suk danglam pek amani siem danglam pek an ni nawna dingin sorkar-in hma la hmasa ding an hril. An umna hmun, block le autonomous council hai chu ṭhiek an nawna dingin sorkar-in hma la bok sien an ti bok a nih.

Anni neka changkang lem hnam 6 hai hi ST-a tiem an ni chun Assam-a tribal reservation le quota a suk tlawm pha ding bakah an ram hai khom a tawk buoi ding an leiin hnam 6 hai ST pek an ni hma’n sorkar-in an chanvo chu humhim hmasa pek phot dingin an hril a nih.

UTOA president Markush Basumatary chun, ST-ah hnam lak lut belsa an ni hma’n sorkar chun State sunga tribal hai reservation a sukpung hmasa phot a ngai a, an hmun hluona ram hai khom a sukzau hmasa phot naw chun tuta ngirhmuna ding chun ST thar a zieklut tum hai hi an changkang lem leiin an inelpui hne naw ding a chiengsa a nih, tiin a hril.

UTOA chun, Assam sung-ah muongna a um theina dinga Assam le India sorkar-in inbiek dinga helpawl hrang hrang hai le inkapchawl a puongpui hai khom an ziekna thuthlung memorandum of settlement (MoS) besanin inbiekna neipui vat dingin a ngen bok a nih.

An thil phut thar hai le inzom hin UTOA chun India prime minister le home minister kuomah lekha an pek ding thu an hril bawk a nih.

Tu taka India sorkar thlungpuiin ST hai hmasawnna le hamṭhatna ding a pek hai hi a hun tawk naw a, hi lei hin an ram hluo bik hai humhimna le humhalna dingin UTOA chun sorkar thlungpui kuomah an chanvo chu sukpunga, sukzau pek dingin an phut bok a nih.

Assam chu ‘Tribal State’ anga puong a ni theina dinga Assam sorkar-in hma a lakna chu an thlop thu an hril a, hi hin Assam-a tribal hnam chitin reng hai chu a humhim ding a nih, tiin UTOA president Basumatary chun a hril bawk.