Manipur deputy CM le home minister sin chel kop Gaikhangam-in Manipur assembly session-a MLA Dr. Ibohalbi zawna a sangna a chun, MDC thatna thu-ah Shangshak police station-ah FIR ziek lut an ta a, hi zo hin sipai hai chun NSCN-IM hai tactical headquarters chu an run a, hel 8 le ralthuom le lekha poimaw tam tak an man bak-ah hel hai hrentang mi 6 khom sansuok an ni thu a hril.
Hi chauh hi niloin, NSCN-IM lekha poimaw dapsuok hai lai chun NSCN-IM in that dinga a riruong mek mi 7/8 hming inchuon lekha khom hmu suok a ni bok, tiin Assembly House chu a hril.
MDC that zo hnung khan vengtu sipai Ukhrul hmuna tir a ni thu hrilin, sipai hai chu mipui hai ta dinga hnoksak loa an sin hai thaw dinga khauh taka hril an ni thu a hril bawk.
ADC chairmen le vice-chairmen hai chu venghimtu pek an ni hla thu hrilin, executive member hai khom tlangram-ah an inzin ding chang an inzinna programme hai sorkar kuoma hril lawk ding le pe lut hlak dinga inhriettir an ni thu Gaikhangam chun a hril a. NCSN-IM hel hai that Ngalangzar Malue ruok chu a nu damnaw kan dinga inhmaw taka an khuo pana fe an leiin Home department kuomah iengkhom a pek lut naw niin a hril.
Manipur tlangram district haia police hai thangpuitu dingin Manipur sorkar chun district headquarters tin-ah army brigade khom a sie thu a hril bawk.
Vauna um loa mipui thlangtling hai that chu Assembly House chun dem ngei dingin a hril a, Ngalangzar Malue chu mimal inhmelmatna leia that niloin Manipur inpumkhatna dinga thi a nih, tiin Gaikhangam chun a hril. Hieng ang inthatna hi sunzom a ni pei chun iengtik huna mani mipui chu a thawtuhai laka tho-in hel hai chun himna ding la hmu nawng an tih, tiin a hril.
Ngalangzar that a ni hi a hmasatakna an ta naw a, Ukhrul district sung-ah politician iemanizat khom that an ni ta a; kum 1980 anthok tu chen hin politician le civilian 100 chuong that an ni ta thu Assembly House chu a hril.
