Churachandpur-a Observation Home chun, Churachandpur district sunga ringot kum 8 sung khan thubuoi nei naupang mi 287 an um a, hieng hai lai hin 180 hai chu helpawl hrang hrang haiin an pawla ṭhang dinga sipaite a an lak lut hai an nih, tiin an suina report chu Manipur Alliance for Child Rights (MACR) kuomah an inentir.
MACR team hai hin an convenor Keisham Pradeep inrawina hnuoi-ah Churachandpur sirin M. Ramthar-a Observation Home, New Lamka-a Priscilla Home le Vengnuam-a Only Grace Home hai sinthawna endikna an nei a nih.
Hieng naupang enkolna ‘home’ hai an sir hin, MACR hai chun mimal sum ṭhangpuina a inenkol an ni ti an hmu suok bok a nih.
Observation Home-a hin kum 13 bawr vel mi pasal naupangte pahni an um bok a, Kuki helpawl an zom le inzomin Army hai chun an man ta nghe nghe a nih. Hieng naupang 2 hai hi Juvenile Justice Board (JJB) hma-ah inlangtir an ni zoin Observation Home-a enkol dinga sie an nih.
Churachandpur-a Child Welfare Committee (CWC) chairperson Daniel Gangte hrildan chun, tu kum sung ringot Churachandpur-ah naupang thubuoi nei 17 an um a, hieng hai lai hin 7 chu damdawi inrui thei thaw an ni a, pahni chu dan kala nuhmei pasalna a thubuoi nei le 3 dang hai chu helpawl a ṭhang leia thubuoi nei niin a hril.
A hril pei danin, Churachandpur sunga naupang enkolna In 3 hai hin tu chenin Social Welfare Department hai scheme Integrated Child Development Services (ICDS) hnuoi-ah ṭhangpuina an la dong ve naw zing thu a hril.
