MIMA-in dawr khar dinga a ngenna chu Aizawl khawpuia dawr hrang hrang ha’n an zawm ṭha hle a, veng tin deu thaw a dawr hai khom khar deu vong an nih. MIMA pawla ṭhang mi iemanizat chu dawr inhong a um le umnaw enfiena’n duty-in an fe kuol bok a nih.
MIMA chun thusuok siemin, Aizawl Municipal Corporation (AMC) licensing regulations ditnaw inlangtirna a sumdawngtuha’n ṭha taka ṭawiawmin dawr an khar chu lawmum an ti thu an tarlang a, “Min thloptuhai po po kuomah lawmthu kan hril. Hun hung tlung pei dinga khom ṭawiawmna le thlopna kan la mamaw pei ding a ni a, lungruol takin hma ei lak tlang pei khom kan beisei,” tiin an hril.
Hienglai zing hin, New Market-a thlaihna hme zortuhai iemanizat an inhonga, hieng hai hi MIMA duty hai chun zor lo dingin an ti a, buoina lien tham ruok chu a suok naw ni a hril a nih.
New Market Sobji Bazar Joint Association chun thusuok siem nghalin, MIMA-in AMC licensing Regulation 2012 an ditnaw inlangtirna dinga dawr khar dinga an ti chu inhriettir an ni naw thu an tarlang a, “Thlaihna hme zortu hai hi thingtlang tieng le phai tienga hai le inthlung kan ni a, kan thlop an dit chun ni 2/3 hma'n min hriettir an ta, kan thlaihna sie el thei hung thontu ding hai kuoma khom inhriettirin kan inbuotsai lawk ve thei ding a nih. Amiruokchu, inhriettir lawk kan ni nawh,” tiin an tarlang.
Sobji Bazar Joint Association chun, "MIMA duty haiin ṭongkam dengkhawng tak le inhmusitna ṭongkama nasa taka kan thlaihna zor lai hai dam mi chil sie peka, sie vong dinga ṭongkam an nei hi na kan ti a; kan fakzongna khom min suktawp pek nuomna ṭongkam hiel an saksuok hi kan dem tak zet a nih,” tiin an hril bawk.
"MIMA-in sorkar-a an thil nor hi ṭha kan ti naw khom an naw a, an association sunga um kan ninaw leiin inbuotsaina hun le ngenna hai khom pek dinga kan inngai laia hieng anga an che hi kan dem tak zet a nih,” tiin an thusuok chun an tarlang bawk.
