Sakhuona leia sunnomna hai ta dinga policy ngen

Guwahati, July 18, 2014: Nilaini July 16 khan Assam sorkar chun, rambung danga sakhuona leia suknomna tuortuhai India ram-ah an hung inpemlut theina dingin India sorkar thlungpui-in rorelna dan thar siem pek dingin ngen an tum thu an hril.

Hi thu le inzomin hin Assam chief minister Tarun Gogoi chun April 20, 2012 khan prime minister Manmohan Singh kuomah lekha thonin, Indo-Bangladesh inṭhe hun laia Indian ram mi an sakhuo biek leia India hung inpemlut hai chu ram puotieng mi anga ngai lo dingin alo ngen ta bok a nih.

Kum 1979-85 sung khan All Assam Students’ Union (AASU) huoihotna hnuoi-ah Assam-ah ram puotieng mi, abikin Bangladesh anthoka dan lo taka hung lut hai dodalna nasa tak a um leiin khang hun laia India PM Rajiv Gandhi chun kum 1985 khan AASU leh Assam Accord a ziek nghe nghe a nih. Hi inremna dungzui chun kum 1971 hnungtienga Assam sunga hung lut hai reng reng chu zong suoka, State puotieng thon let nawk ding ti a nih.