Inṭhungkhawmna-a tarlang danin, ‘generic drugs’ hai hi chemical um ang ang hming put el hlak, chemical pawl inang tho si, damdawi siemtu company hrang hrang ha’n a hming hran an inputtir hlak a ni a; zor ṭeu theina dinga a tuomna kawr hai nal tak taka siem ‘brand name’ nei damdawi to tak tak hai nekin a man a zatve deu thaw a inhnuoi lem an nih.
Inṭhungkhawmna-a chun, ‘generic drugs’ an ti hai chu a bul inṭanna dingin MSHCS enkolna hnuoi-ah Aizawl Civil Hospital compound sunga Jan Aushadhi (JAN) Generic Drug Store siem nisien, ti a nih.
Aizawl Municipal Corporation (AMC) sunga private employer hrang hrang – private school, nursing home le a dang ha’n sinthaw dinga an sor hai ta dinga hamṭhatna ding Employees State Insurance Scheme (ESIS) hmang ve thei dan ding hriltlang a ni bok a; ESIS hi ESI Corporation fepui niin, private institution-a sinthawtuha’n damnawna leia sin an thawnaw chang hlaw an hmu ngai naw leia phurukna um a nih.
Inṭhungkhawmna-a tarlang danin, kum 2014-15 a dingin Rashtriya Swasthya Bima Yojna (RSBY)-a inziek lut mi 1,52,983 le Health Care Scheme (HCS)-ah mi 1,11,678 an ni a; sorkar kum fe mek-ah tu chenin damnaw sengso phurukna a dingin RSBY-ah Rs. 1,47,22,460 le HCS-ah Rs. 83,54,626 pek suok ni a hril a nih.
