MSDS chairman Haukhuma Hauzel chun, ṭhalai hai training pek bakah training zoa sin thokna ding siem pek nghal theitu ding an ngai poimaw thu hrilin, “Thok ṭan tira hlaw ṭha pe nghal theitu ding kan zong a, kan zong ang ngeiin thokpui thei ding kan hmu hi lawmum kan ti hle,” tiin a hril.
BESPL CEO Michael Bhullar khomin, Australia le ram danga chun sin petu haiin degree insang ringot niloin, thiemna sortlak an ngai poimaw thu a hril.
Sorkar thusuok tarlang danin, MoU hnuoi-ah Class XII pass chin hai ta dingin traineeship programme buotsai ning a ta, kum khat sung India ram-ah training phot an tih. Ṭha taka training zo hai kuomah Australian certificate inhlan ning an ta, BESPL-in training & research Visa buotsai pekin, Australia rama kum 2 sung thiemna ṭha lem nei dingin inchuk nawk an tih. Kum 2 a liem hnung-ah kum 4 dang Australia-a sinthaw phalna nei an ta, kum khat-ah Rs. 30 lakh hu vel hlaw thei dinga sut a nih.
BESPL hnuoia hin fabrication and welding engineering, mechanical trade, manufacturing technology (CAD), mobile plant technology, heavy commercial vehicle mechanical technology, air-conditioning & refrigeration le electrical fitting course hai inchuk thei ning a nih.
Hi company anthoka training zo hai kuomah Diploma-to-Degree (D2D) inchuk theina dingin lampui buotsai pek ning an ta, hi hin Australia-a universities 4 - Australian Catholic University, Charles Sturt University, Southern Cross University le University of Western Sydney) a hai Bachelor degree an inchuk zom thei ding a nih.
Hi company hnuoia programme hai hi Australia sorkar hnuoia Technical & Further Education Commission-in a hrietpui bak-ah India sorkar hnuoia Nation Skill Development Corporation khomin a hrietpui bok a nih.
Hi company-in thoktlangna thuthlung a ziek hi India State hai lai Mizoram hi a hmasatak ni a hril a nih.
