Rose Gangmei hin a In hi thla 7-8 vel liemtah khan a hluo ṭan a, West Delhi Punjabi Bagh-a beauty parlour-ah receptionist sin thaw lai mek ni a hril a nih.
Police hai hrildan chun, zani chawhnung dar 1 vel khan a inkawlnu Pannam chun Rose in hluo chu hang hongin, Rose ruong chu a room-a hnuoia chun a thi sa’n a hmu a nih, tiin an hril.
“PCR call hung siem a ni a, police team chu a hmuna fe nghalin an enfel a, insukbuoina sinsiena iengkhom hmu a ni nawh,” tiin police hai chun an hril.
"A pum-ah hliemna iengkhom hmu a ninaw a, a headphone ngai hai khom tawk chet an nawh,” tiin an hril bawk.
Police chun Manipur nunghak thina chungthu a hin thil indik nawna le ringhla nei naw hai sienkhom a thina san hrechieng dingin a ruong hi post-mortem dingin an pek a, CrPc 174 ziek lutin a thina hi suichieng dinga an ti a nih.
