Phulpui naupang pahni an inhmang

Aizawl, July 28, 2014: Kar hmasak Inrinni July 26 khan Mizoram Phulpui khaw naupang Lalrinpuia (k. 13) s/o Lalbiakdika le Lalrosanga (k. 12) s/o Lalpanliana hai chu Mizoram-a Tuirivang vadung kama Lalrosanga hai huona fe chu an inhmanga, zani chen khan zong hmu an la ninaw a, vadung-ah an tla ni dinga ring a nih.

Hieng naupang pahni hai hi an nu le pa hai an kir hnungin ngakuoi inchie dingin Tuirivang-ah an fe a, zan dar 8 vel khomin in a'n lan lawinaw leiin an sunghai chun an zonga, vadung-ah an ipte le thuomhnaw hai an hmu a nih. Zan dar 10:30 vel anthokin khawtlangin an zong a, mi 150 velin vadung-ah an riekchil bok a nih.

Zani khan zong sunzom nawk a ni a, an kekor le chapal hai hmu belsa a nih. Mi inhmang zongna a hin Hlimen le Sumsuih inkara khuo hai anthokin mi 700 vel an inthok suok a, hmu an ni hma po Mizo danin ni 7 le zan 7 zong ning an tih.

Ruong zongna hmuna hin bieltu MLA KS Thanga, add. DC Lalchungnunga le Central YMA ṭhuoituhai khom an fe a, KS Thanga hin ruong zongtuhai fak ding bufai le dal bag 2 a pek.

Phulpui khuo hi Aizawl district-a Aibawk block huom sunga um a ni a, Aizawl khawpui anthokin km 24 vela hla a nih.