Sumo motor changsuolnaa ṭhang mi 2 hai ruong hmu tah

Aizawl, July 28, 2014: Kar hmasak Zirtawpni July 25 zing dar 6 vela Mizoram-a Sairang pel Buichali leilak bula Sumo changsuol, Tlawng vadunga tla luta chuong hai ruong la hmu lo pahni hai chu zani khan hmu a ni a; vadunga tla ve tho ni a ring second-driver chu vadung-ah a tla ve naw a, an in a tlung ta niin ei thu lakna chun a hril.

Sumo driver Mitum Sukla Bodhy ruong chu motor tlakna thlang met-ah zing dar 5 vel khan hmu a ni a, zing dar 9 vel khan passenger dang pakhat Vinod chu Buichali thlang deu-ah hmu nawk a nih. Ruong hai hi post-mortem an ni hnungin an khuo-ah thon nghal an nih. Vadunga tla ve tho a ngai second -driver chu an khuo-ah a um ta a, a hliem nasa taluo naw niin ei thu lakna chun a hril bawk.

Ruong zongna sin a hin mi iemanizat an inthok suok a, zan khawvarin an zong hlak a nih. Central YMA ṭhuoituhai khomin an uop zing bok a nih. Hortoki khuo tieng khom an khawsung Tlawng kai-ah mi iemanizatin zan khawvarin ruong hi an lo zong bok a nih.

Sumo changsuol a hin mi 8 an chuong a, mi 5 hai chu damin an suok dok a, mi 3 hai chu vadung tuiin a len hmang anga ngai an nih. Sumo hi Karimganj anthoka Saiha pana fe a ni a, motor a chuonghai hi Vai vong ni a hril a nih.