Dated 18th July 2014
To
The Chairman/Secretary,
Hmar Literature Society, Mizoram
Puhai,
Social Networking Site “Virthli” a Rebecca Sanate in Hmar Literature Socity, Mizoram resolution a hung post hi kan lo tiem ve a, Lalmalsawma Darngawn, Vice Chairman le J. Lalvarlien Puruolte, Secretary hai hming le signed ti chuongna hi thutak ngei a ngai a ni leiin hi thu hi hung siem a nih.
In Res. No. 1 a “Literary Meet” ko theitu a HSA in ngai naw hi thil mak tak a nih. HSA hi a ko theitu tak student organisation a nih, ti hi in lo hriet ve dingin tha’ng a tih. Students organisation/association in student hai hmakhuo ngaia hieng ang thil a huoihawt tum hi a thaw ding hrim a nih, student hai chun MIL (Hmar) inchûktu, Hnam ṭhuoitu ding an la ni a, an inchûklai hmakhuo ngaia student hotuhai in hieng ang programme a siem chu thil makmaw a ni lem a nih.
In Res. No. 2 a Literature Society Coordination committee in siem thu, Literature le a concern tieng thil hrim hrim chu Literature Society chau thaw ding, pawl dang hrim hrim hieng tieng pang concern a inkhawm ko lo dinga in hung ti hi chu anvêt thlâk hle a nih. Iengtik lai khan am Hmar ṭawng, thu le hla hi Literature Society chau hril le ngaituo dingin Hmar Hnam in MANDATE a pêk cheu a? Copyrights/Patent khawlaia inthawkin am in hmu a? Literature Society chau hin Hmar ṭawng a hmang ding a ni? Mi’n Hmar ṭawng a hmang thiem naw amanih a hmang indiknaw chun Literature Society in action a lâk ding tina nîng a ti? Literary Programme buotsaia HSA hmalâkna hi a kuong lo ding nawr ni lovin A KUONG INDIKTAK A NAWR A NIH ti hi lo hre ta hlak ro.
In Res. No. 3 a in hung târlang khawm hi Literature Society chau huop a nih, ti hi in hrietchieng ngei kan ring. Tu china Literature Society fe dân kan hriet dân chun Member ni dinga in register hai chau HLS member an ni a, Hmar hnam pumpui a huop zo chie naw niin anlang bawk. Inclusive ni lova Exclusive society hnam hminga mi tlawmte indin a nih, ti a sukchieng bawk. In lo hriet nawk dinga ṭha chu, HSA chun iengtik lai khawma Hmar ṭawng hi sukchingpen amanih, sukdanglam a tum ngai naw a, chu nêk hmanin a sukhring, humhal le sukhmasâwn dingin hma nasatakin a lo lâk ta hlak a nih. Seminary/Workshop hiel khawm a lo ko ta hlak a, chu taka paper hai khawm a bua siemin vawisûn ni hin hmu thei in a la um bawk.
In Res. No. 4 a in hung ziek khawm hi bêlchieng a dâwl zo naw khawp in kan hriet. Hmar ṭawng ziek dân le hmang dân hi Hmar khawvêl a hin an ang vawng nawh ti chu thlasik le nipui a um hlak anga thil chiengsa a nih. Hieng chen hi HLS in hma a lo lâk ta a, vawisûn ni chen hin Hmar ṭawng ziek dân inang vawng Hmar haiin ei la hmang thei naw chu a ni hih. Inang tlâng ei nuom si chun ei rênga ei ṭhangruol chu thil pawimaw tak le mâkmaw a nih, ti hi nangni ang mithiem hai lungril ah a la pieng hman naw ni ngei a tih.
Ei Hmar hnam, ṭawng le nunphung hai hi ei hmangai seng a, ṭhahnem ei ngai seng bawk. Sienkhawm, ei ṭawng hi ei HUMHAL (protect) el chauh ni lovin ei sukhmasawn (develop) a ṭûlin a pawimaw ti hi ei hriet sa pawimaw kan ti hle. HLS-in Hmar ṭawng ziek dan 'style' tia a pawm le namdet hi iengtiklai khawma HSA chun a sawisêl naw a; thlâk danglam a tum bawk nawh. Amiruokchu, ngaidan le ditdan thar hung suok peihai hi ei hriltlâng a, ei sechip a pawimaw niin kan ngai ve tlat. Hmar ṭawng hi State pahni le University pahniin an mi recognise lei ela Hmar ṭawng hi ansâng ta êmêm anga ei ngai chun ei ngaisuol thei ti hre bawk ei tiu. BA chena Hmar MIL ei nei leiin Hmar ṭhangthar haiin Hmar ṭawng an thiem pha in an ziek thiem pha hle le hle naw ti khawm ngaituo ve met a ngai bawk. HLS ṭhuoituhai hi hnam ta dinga in inpêkzona le contribution hai kan lawmin ka ngaisang hle zing laiin in hnunga ṭhuoitu le mawphurna latu ding in buotsai a ngai ti lo hrie ve bawk ro aw.
Chun, HPC le Mizoram sawrkâr Accord dungzui in SHDC area sungah “ADMINISTRATIVE AND OTHER STEPS: 5.1 With a view to satisfying the desires and aspirations of Hmar community in Mizoram, the State Government will initiate measures for use of Hmar language as a medium of instruction upto Primary level and recognition of the Hmar language as one of the major languages of the State of Mizoram.” dam hi Mizoram HLS hin hma la sien, Mizorama um Hmar ni si Hmar ṭawng hmang ta lo le hre lo hai in Hmar ṭawng an hriet le hmang theina dingin hma la sien ti hai dam hi Mizoram HLS thaw ding tak pakhat ni veng a tih.
A tawpna taka dinga kan hung hril nuom chuh – HSA in HLS ṭhuoitu hai a râwn a, an thurâwn a lâk taluo hi a suksuol lem el am a ni aw… ti thei dingin a um. A phut takin Thupui ding bîk umlo a siem a na, HLS Secy., Manipur in siem inla ti thurawn a pêk dungzuia thupui siem a ni a. Ama vêk inhmutir nawk a ni a, mi ṭhenkhat subject hai khawm ama dit dân taka thleng nawk a ni bawk. HLS ṭhuoituhai thurawn dungzuia thupui (topics) hai chen siem a ni hnung khawma hieng anga upa lem le inchûk sânglem hai anthawka dawnna a hmu hi HSA ta ding chun mak ti naw ruol hrim a ni nawh. Thil hrim hrim râlkâng anthawka zêldin thua ‘sakhi thinglêr inlâwntir” nêkin andiktak hre chieng zeta thuthlûkna siem chau ni hlak sien chu kan nuom takzet a nih.
Ram le Hnam Inchûklaihai âi in,
Sd/-
ROCHUNGHNUNG
Chairman
Sd/-
JOSEPH L. INFIMATE
Secretary / Prog. Coordinator
Sd/-
LRS PURUOLTE
Programme Coordinator
HSA Platinum Jubilee Celebration Committee & Literary Meet HSA Platinum Literary Meet
