Hi le inzom hin All India Congress Committee (AICC) hotulien hai chu Delhi khawpui-ah voisun le zinga hin inṭhungkhawmin thutlukna siem an tih.
AICC high-level meeting a hin AICC president Sonia Gandhi, vice-president Rahul Gandhi, general secretary le Manipur incharge Luizinho Falerio, Manipur CM O Ibobi Sing le a deputy Gaikhangam hai chu ṭhang an tih.
Manipur Congress ticket-a thlangtling MLA hai chun minister chellai mek 10 hai le Manipur Speaker chu thlak dingin Congress hotu hai chu nasatakin an nor a, minister 3/4 vel thlak dinga an phut chu 4/5-in an sukpung nawk ni a hril a nih. Tuchen hin tuha’m thlak ning an ta, tuha’m minister nina pek ning an ta ti reltluk ala ni nawh.
Minister anthoka thlak dinga Congress MLA ha’n an tumtar bik deu hai chu Forest and Environment Minister Th Debendra, Health Minister Phungzathang Tonsing, Industries Minister Govindas Konthoujam, IFC Minister Ngamthang Haokip, PHE Minister I Hemochandra, Education Minister M Okendro, Rural Development Minister Francis Ngajokpa, Works Minister Dr Kh Ratankumar, Social Welfare Minister AK Mirabai le Agriculture Minister Md Nasir hai an nih.
MLA hai chun Manipur Speaker Th Lokeshwar khom thlak dinga an phut bok a nih.
Tu taka Manipur Congress-in MLA a nei zat chu 47 a nih.
Tuchena hin tuha’m thlak ning an ta ti hril thei ninaw sienkhom, district le sub-division haiin minister an nei zat le um zat izira thlak kuol an ni el thei thu ei thu lakna chun a hril bok.
