Hi hun a hin CCPur SDPO Emmanuel L. Fimate, MPS chu khuollien niin thu ṭha tak tak hrilna le infuina a nei. Emmanuel chun, “Tumruna le titakna nei phawt chun ram dang le hmun dang pan kher lo khawma CCpur-a College kai khawma hlawtlingna a umzie le mi tamtak chun nuom pawnga mihai lifestyle a ṭha le a ṭha naw thlier thiem loa entawn ei ching hi bansan a ṭul,” tiin a hril.
“Inchuklai ha’n hotuhai kai ṭhat naw suonlam loa, an kai ṭhanaw a lo ni khawma School/College kai zing tho ding le inchuklaihai ei fe zing tho chun hotuhai khawm kai loin um um pei bik naw ni hai” tiin khuollien chun inchuklai hai an fui bawk a, inchuklaihai chu an inchukna ngai pawimaw a Social le Kohran-a inhmang dan chin tawk thiem di’n an fui bawk.
A hril peina a chun, CCPur police-in tulai hnai le August thla chu Zu do thla-a a puong chu hrat taka fepui mek a ni thu a hril a. Zu hin ei rama inthatna le suolna chi tum tum, mi tam tak fahra a siemtu le nupuitebawp tam tak hmeithai a siemtu a ni thu hai a hril. Hieng leia do a ni thu le zu do pawl Nupui Pawl hrang hrangin a hma lakna an lo thlawpna thu-ah lawmthu a hril bawk a nih.
SDPO chum, zu siemna hmun le an thupna hmunhai po po khawm report an dawng thu le hrietchieng a ni hle thu a hril a. “Kristien inti ha’n zu ei dawn a, a thuppuitu-ah ei la hang ṭhang nawk pei lem hi thil awmlo le inzak um a nih,” ti a hrilinn, pawimaw le mamaw hai khawm hriet karthlak a ngai ziehai a hril bawk.
CCPur ngei a khawm Bank Account tehlem siema, sum du leia midum mi khawhlo tam tak takhai le inthlawp hlak man thei ding hriet suok an ni ta thu le mitin hiengang laka fimkhur di’n an fui sa bawk.
Hi huna khuolzaumin Joseph Joute, Freelance Journalist khawmin thuhrilna hun neiin, ama ngei khawm CCPur Govt. College-a BA zo le hi College a’nthawka seilien tam tak an um tak thu hai a hril. Chuonghai laia a lo kai pui hlak Jimmy Hrangate, Dy. Comdt., BSF (Manipur & Nagaland) le VL Renga Hriler, Ministry of Defence (GoI) a nina insang tak chel phak hai ngei khawm an ṭhang thu hai a hril.
Joseph Joute chun, khawvel thiemna an sang tak zie le technology hung suok pei hai khawm thiem taka hmang a ṭul zie hai a hrilsa bawk.
Freshers Meet hun a hin HSA GHQ ṭhuoitu le HSA JHQ, CCPur ṭhuoitu haiin an ṭawiawm bawk.
Hi huna hin Unit sunga mi 32 graduate thar hai chawimawina lekha inhlan an ni bawk. Hun karlak-ah hip-hop hmu nuom um tak el SNUMB Crew-in an inentir bawk. Esther Lalsanhim (Hmarram Lelte) le Eljoykim Infimate hai khawmin hla-in fekhawmhai an inawi bawk.
Mr. Fresher 2014-in Hosea le Miss Fresher 2014-in Sharon hai thlang an nih.
Zantieng programme hmangzo a ni hnungin ruoi inhnik taka buotsai kiltlang a nih.
