BSF inspector general Meghalaya frontier in-charge Sudesh Kumar chun, a hma anthok khan Bangladesh anthokin ralthuom tam tawk tak India ram-ah tolruk a ni hlak thu le tuhin Burma anthok ralthuom tam tham tak tolruk a ni hlak thu a hril.
Kumar chun, India ram khawthlang tieng chu hmarsak nekin venghimna fepui a olsam thu a hril a; hmarsak biel ramri laia ram hai chu chengna ram sie tak tak an ni leiin venghimna fepui a harsa thu a hril.
India le Bangladesh ramri km 443-a sei venghimna dingin BSF-in theitawp a suo thu a hril a; Bangladesh anthoka India-a poi thaw tum hel hai lo dang an ni theina dingin venghimna khauh taka fepui a nih, tiin a hril bok.
Kumar chun, Burma le China anthoka ralthuom tolrukhai chu Nagaland-a sumdawngna hmunpui Dimapur-ah laklut a ni hlak thu hrilin, Dimapur anthokin hmarsak State hrang hrang-ah thondar nawk hlak a ni thu a hril.
India le Bangladesh ramri inhuon ringotin ralthuom tolruk le helpawl hai chetlakna veng thei a ninaw thu hrilin, Kumar chun, BSF ha’n venghimna khauh taka an fepui laiin dan i phal lo thil thawtu an um zing tho a nih, tiin a hril.
