Pherzawl ADC thu-ah Tipaimukh Village Authority Union-in rally huoihot ding

CCPur, August 6, 2014: Thla hmasak July 29 khan Tipaimukh biel-a Village Authority Union chun an general assembly thurel inhriettirna siemin, tu chena Thanlon constituency sunga Pherzawl Autonomous District Council (ADC) hong a la ninawna thu-ah poi an ti thu le hong a vat theina dinga norna Rally nei tum a ni thu an thusuok chun an tarlang.

Tipaimukh Village Authority Union (TVAU) chun, “Kum 2013 December 23-a Pherzawl ADC hong dinga State sorkar-in programme a lo siem tah voisun chena hong loa la um zing hi V/A Union chun poi a ti hle a, hieng anga sorkar hmun poimaw mipui hai khoma iengtik am function a ta ti a an lo thlir zing voisun chena a ni ding ang taka hmang ṭangkai thei loa a um hi poi an ti hle,” tiin an hril.

TVAU chun, Pherzawl ADC chu an rang thei anga hong a ni theina dingin Rally nei nisien tiin thutlukna siem a ni thu hrilin, Rally hi August 15 hma ngei a huoihot tum a ni thu an thusuok chun a tarlang bawk.

Rally hi Tuiṭhaphai le a sevela mipui hai le Hmarbiel-a mipui haiin an nei ruol theina ding le Tipaimukh le Thanlon biel MLA le MDC hai le inrawntlanga an thurel sukpuitling ngei a ni theina dingin a ṭul ang peia pawl hrang hrang le political leader hai khoma thlop seng dingin an ngen tak zet thu an hril bawk.