AFSPA hlip dinga bu a nghei leiin Manipur sorkar chun Sharmila hi mani inthat tum ti a intumin thubuoi a siem pek a, Chief Judicial Magistrate (CJM), Imphal East chun thubuoi hi ngaituo pekin, thiemnaw a'n changtir a nih. Sharmila hi lung-in intang dinga hrem nisienkhom a hriselna a ṭha naw leiin police hai venghimna hnuoia khom suok thei loin damdawi-inah hrentang zing a nih.
Sharmila hin CJM Imphal East thusuok hi Court of Sessions Judge-ah khingletin, a aiawtu dingin human rights lawyer Khaidem Mani chu a ngir a nih.
Imphal East session judge A. Guneshwar Sharma chun, sorkar aiawa ngir Y. Indira le Sharmila aiawtu Khaidem Mani hai thuhril a ngaithlak zoin, Sharmila thubuoi chu a hlip pek a, insuo zalen a ngai thu a puong tah a nih.
“Sharmila-in tiemchin um loa bu a nghei leia mani inthat tum ni a thubuoi siek pektuha’n an intumna-ah sukfiena ringthlak iengkhom an nei naw a nih,” tiin session judge chun a hril. Mani inthat tum ni a intum leiin IPC section 309 hmangin Sharmila hi hrem a nih.
Court chun, “Kum 42 mi Sharmila nuor nasan chu politics thil-ah a muongum zawnga AFSPA hlip a hni lei a ni a, a bu nghei chu a thil phut hlawtling hma chun sunzom a tum lei a nih. Bu nghei sunzom pei a la tum a ni chun State sorkar-in a hriselna le a himna a ngaituo pek lem ding a nih,” tiin a hril bok.
Sharmila hi Jawaharlal Nehru Institute of Medical Sciences (JNIMS) damdawi-inah a hnar anthokin bu tuiril thun lui pekin enkol a ni a, puotieng a suok phal pek a ninaw bak-ah police hai venghimna hnuoia sie a nih.
Dan angin ni 365 sung chauh hrengtang thei a ni leiin insuo zalen a ni hlak a, hi hnung hin thubuoi dang siem sumzom pek pei hlak a nih.
Kum 2000 November khan Assam Rifles sipai ha’n Malon-a helpawl dapsuokna beipui an thlaknaa khan mi poitawklo 10 an kaphlum leiin Sharmila hin sipai hai kuoma thuneina insang lem pekna dan AFSPA hlip ngietin bu a nghei ṭan a nih.
Court of Sessions judge chun a thutlukna chu Imphal East CJM le Manipur central jail superintendent hai inhriettir dingin thusuok a siem bok.
Hienglai zing hin Sharmila insuo zalen a ni theina dinga campaign ṭum iemanizat lo huoihottu Amnesty International chun Sharmila insuo zalen a ni chu lawmum an ti thu an tarlang.
Amnesty International hin Sharma insuo zalen a ni theina dingin nikum khan India ram hmun hrang hranga mi langsar 18,000 chuong hai thlopna an hmu a, thudelkil um loa insuo zalen dingin an lo phut tah a nih.
Amnesty International India programme director Shailesh Rai chun, court thutlukna chu lawmum a ti thu hrilin, Sharmila bu nghei chu mihriem indikna chanvo sirdena laka intal suok tumna a nih, tiin, danin indikna chanvo ami pek muongum taka inlangtirna a nih, tiin a hril.
Loading....