Court hmaa ngir dinga Kejriwal vauh

New Delhi, April 19, 2014: Inrinni khan Delhi chief minister hlui le Aam Aadmi Party (AAP) hotu Arvind Kejriwal le AAP hotu dang pathumhai chu Court-in a ko naw ni-ah an inlang naw chun an chungah tharum hmang ning a tih, tiin a vauh.

Kejriwal le AAP hotu pathumhai chu hming suksietna thubuoi le inzomin court-a inlang dinga ko an ni a, amiruokchu an inlang naw leiin Delhi Metropolitan Magistrate Sunil Kumar Sharma chun an chunga thubuoi ngaithlakna ni chu sonin, “An chungthu hi May 24 hin ngaithlak dinga son hlat a ni a, hi ni hin an renga court hma-ah an inlang naw chun an chungah tharum hmang ning a tih,” tiin a rel.

Kejriwal le AAP hotu dang pathum hai chun nikum May 15-a thuthar lakhawmtuhai an inhmupuinaa chun India sorkar-a Communication Minister Kapil Sibal naupa chu a pa minister ani lai telecom company Vodafone aiawin Supreme Court hmaa a ngir, tia an intum leia Sibal naupa Amit chun hming suksietna thubuoi court-ah a thelut a, court-in Kejriwal le a thloppui hai chu a ko a nih.

Kejriwal le AAP hotu pathum hai chun Lok Sabha inthlang ding le inzomin an campaign buoi ding leia an inlang thei naw ding thu-ah hrethiem dinga ngenna an siem chu pom pekin, amiruokchu, ko nawk an ni hunah inlang ngei dingin an counsel Rahul Mehru chu an hriettir.

AAP hotu dang pathumhai chu Manish Sisodia, Prashant Bhushan le Shazia Ilmi hai an nih.

Court chun court hma-ah an inlang naw leiin Rs. 2000 seng chawi dingin a rel bawk.