Lungnila Elizabeth thattu nia intum mi 2 man

Imphal, April 17, 2014: Zani khan CBI haiin kum 2003-a nuhmeite kum 8 mi Lungnila Elizabeth nunrawng taka thatna thubuoi a thang nia intum pahnina chu an man a, voisun khan Imphal West-a Duty Magistrate hma-ah inngirtir a nih.

Intum a um hi L. Suresh alias alias Biren alias Nabakeshor (k. 45) s/o (L) Thambalngou of Pukhao Naharup, Nongmaikhong veng-a cheng a nih. Ama hi CBI kutah ni 5 sung um a ta, April 21 khin CJM Imphal West hma-ah inngirtir ning a tih.

L. Suresh alias Biren hi zani khan CBI special team haiin Sangaiprou hmun lai zani zantieng khan an man a nih.

CBI-in Court-a report a thelutnaa a tarlang dan chun, Laishram Biren Singh hi KCP helpawl a ṭhang hlak a nih.

Elizabeth thattu laia ṭhang ve nia intum pakhat Nando Singh inpuongdan chun, Lungnila Elizabeth hi ama, Suresh alias Biren, Raju, Arnold, James Kuki, Rome le midang an hming hrietchienglo hai chun an ṭhuoihmang a, Maruti Van in Churachandpur tieng panin an fe a, Kangei khuo-a in pakhat a chun in khum niin a hril.Ṭhuoihmangtuhai lai hin Lungnila Elizabeth sunghai ni dinga ring hrietchienglo nuhmei pakhat khom a ṭhang nia hril a nih.

Ni 2/3 vel hnungin Lungnila Elizabeth chu Imphal tieng ṭhuoi phei nawk a ni a, Sangaiprou-a in pakhat-ah sie-in, chu hmuna chun that ani thu a hril bawk.

Hi hmuna inthoka Lungnila Elizabeth ruong hmu dok ani khan Suresh le an thloppui nia intum mi dang dang hai chu tlanse-in an inbi hmang a nih.

Hi inrukhmang le tuolthat thubuoi a ṭhang nia intum ve pathum laia 2 hai chu man an ni ta a, a pathumna Ngamkhotinal Lhouvum alias Ngamphu alias King hi zong mek a nih.

Pathum hai laia CBI-in an man hmasatak Ningthoujam Heisnam Premi Devi hi RIMS Campus, Imphal-ah April 8 khan man a nih. Anni pathum man theina ding hin CBI chun Rs. 1 lakh seng an or tir a nih.

Lungnila Elizabeth hi Manipur MLA hlui Francis Ngajokpa naunu a ni a, kum 2003 November 4 khan a school kaina Little Flower School gate laia innthokin hmelhrietlo haiin an ṭhuoihmang a, a ruong chu kar khat hnungin a kaina school anthok hla rak lo – Sadokpam khuo kawllai vel anthok November 12 khan hmu dok a nih.