YMA-in hlamzui a ngaia fepui dingin a rel

Aizawl, April 16, 2014: YMA rorelna insang tak dottu - Central Coordination Committee (CCC) chu zani khan Central YMA Hall-a inṭhungkhawmin, hlamzui sawngbawl chungchangah fepui dan pangngaia fepui pei ding an rel.

CCC meeting hi CYMA president-in a ṭhuoia, "Joint NGO Coordination Committee-in total bandh a ko chungchangah mi ṭhenkhatin political party ṭan bik nei niin YMA chu intum hai sienkhom, April 7 le 8-a total bandh huoihot kha ram le hnam ta dinga thaw ani leiin YMA chu politics-ah an rawl nawh," tiin CYMA president Lalbiakzuala chun a hril.

Total bandh nei ding ni khan political party mi ṭhenkhatin SMS-in thu indik lo tak tak an puongdar nia hrilin, chuongang mi chu YMA-in a dem ngam a ngai, tiin a hril bawk.

Lalbiakzuala chun, Bru lak kirna ding thu-ah kum 1995 electoral roll-a hming chuonghai le an thlahai naw chu Mizoram mi indik taka pom an ninaw ding thu hrilin, “Hi hi tlawmngai pawl hai le political party po po hai thusuok a nih. An hung kir ani khomin a hu hua um khawm loin, an tlansiet hmaa an umna hmuna chauh inumtir kan remti ding a nih,” tiin a hril.

CCC meeting chun, YMA-in hlamzui a sawngbawl dan chu ṭha tawka ngaiin sukdanglam lo an rel a, Mizoram puotienga ruo thon suok chungchang-ah Environment & Forest department hotu hai hrilpui nisien, chu hnunga thon suok lui pei ani chun na taka do dingin an rel bok a nih.

CCC chun, YMA kumpuong - ram le hnam humhalna dingin Mizoram pumpui-ah ILP endik runpui neia, hnam dang dan loa Mizoram-a sumdawnghai dap suokna beipui thlak a, sorkar building-a mumal lema motor parking siem ani theina dingin department tin hotu lienhai inbiekpui ding, ti hai hi an rel bawk a nih.