MCFS chun, Singapore-ah Mizo domestic worker (mi umpui) an pungpei ti an hril ruolin, harsatna tawk an um zeuh zeuh thu a hril a; Mizoram mi ni si, Burma passport hmanga Singapore-a fe ha’n harsatna an tuok phat inṭhangpui a harsa hlak a, Burma le Singapore sorkar-in an hriet suok lem chun thubuoi lien tak siem pek theina a ni thu an hril.
MCFS chun, Singapore chu dan khauh tak kengkawna ram a ni ti hrilin, “Thil indiklo thawtu chu sorkar-in a dim naw hle. Hmunhnok a bawma pei naw lei ringot khoma sum tam tham tak chawi theina ram a ni leiin dan zawm el a varthlak a nih,” ti a hrilin, Burma sorkar khomin passport-a thil indiknaw thawtuhai chung-ah na taka action lak theina dan a nei ti an tarlang bawk.
Singapore-a domestic worker sinthaw dinga kumtlinga ngai chu kum 23 chin tlin an ni thu hrilin, MCFS chun, kum tling chauh fe hlak dingion an incha a, “Kum tling si lo, kum tling anga inziek hi sorkar dan bawsietna a nih. Harsatna an tuok changin insan a buoithlak nuom hle. La naupang taluo hai hi chu anni le anni khom an inhril suok zo naw hlak a, fimkhur hle a ngai,” tiin an hril bawk.
MCFS chun, Singapore-a mi umpui sin thaw dingin lungril puitling tak put le rinum tak khom tuor huoma inbuotsai a ṭul thu le mi thuhnuoia kun ding le siehlaw ni thei dinga lungril siem lawk a ngai thu an hril a; natna nei dam a inngai tah, sin sawlum thaw leia na nawk el thei chi hai ta dingin fe naw a ṭha tak," tiin an hril bok a nih.
Singapore-a mi umpui ni dinga fe hai chu an agency hai anthokin an chanvo indon suok ngei dinga incha-in, MCFS chun, “Agency laka an chanvo le Singapore an tlung huna an chanvo hai agency kawla inthokin chipchier taka hni hlak a ngai,” tiin an incha bawk.
